Иргэн "Ю" барааны тоо хэмжээгээ худал мэдүүлж, хяналт шалгалтад хууль бусаар нөлөөлөхийг завдсан

Туркээс ирсэн карго ачааны хяналт шалгалтын талаар мэдээллээ.  Гаалийн байгууллага 2021 онд нийт 933 удаагийн зөрчлийг илрүүлж улсын төсөвт  2.7 тэрбум төгрөгийг төлүүлж шийдвэрлэсэн. Зөрчлийн 80 хувь нь орох чиглэлд үйлдэгдсэн байна.  Энэ оны эхний хоёр сарын байдлаар 192 зөрчил илрүүлж 450 гаруй сая төгрөгийг нөхөн төлүүлсэн. Зөрчлийн 50 хувийг гаалийн татвараас зайлсхийх зөрчил илэрсэн. Хил нээсэнтэй холбоотой хязгаарласан барааны хууль бус зөрчил нэмэгдсэн байна.

"Энэ оны гуравдугаар сарын 7-нд мэдүүлэгч ачаа тээшээ мэдүүлсэн. Нийт 19.9 тонн жинтэй 472 ширхэг хайрцаг мэдүүлсэн. Ачаа тээшийг тухайн өмчлөгчийг байлцуулж байж ачааг задалж хяналт явуулдаг. Энэ тохиолдолд тухайн иргэнийг  дуудахаар ирэхгүй, ирэхээрээ шалгуулахгүй ийм нөхцөл байдалтай байсан. Өнөөдрийн байдлаар 350 ачааг нь шалгаад дууссан. Одоогоор тухайн иргэн ирж ачаагаа шалгуулаагүй байна.  Иргэн Ю бараагаа 4-5 дахин дутуу мэдүүлсэн. Одоогоор иргэн Ю-гийн  307 боодол ачааг шалгахад 13500 барааг дутуу мэдүүлсэн. Тухайн иргэн лайваар буруу мэдээлэл өгсөн, ирээд ачаагаа шалгуул гэхээр шалгуулдаггүй зэрэг хяналт шалгалтын үйл ажиллагаанд хууль бусаар нөлөөлөхийг завдсан. Гаальд мэдүүлсэн байдал нь ачаатай нь харьцуулахад худал мэдээлсэн байсан тул нарийвчилсан шалгалт хийхийн тулд гараар шалгасан. Иргэн эхлээд тээврийн зардлаа дараа нь тоо хэмжээгээ худал мэдүүлсэн. Зарим бараагаа мэдүүлээгүй. Мэдүүлэхдээ хамгийн хямд үнэтэйгээр мэдүүлсэн ч шалгаад үзэхэд өндөр үнэтэй бараа байдаг" гэв.