БХБЯ: Цементийн үнэ энэ сарын 1-нээс хойш огцом 30 хувиар нэмэгдсэнд ШӨХТГ-ын шалгалт оруулна

 Цементийн үнэ энэ оны  гуравдугаар сарын 1-нээс хойш  30 хувиар нэмэгдсэнтэй холбоотойгоор БХБЯ ямар арга хэмжээ авч байгаа вэ гэдгийг тодрууллаа. ААН-үүдээс хамгийн эхэнд "МАК цемент" ХХК  28.6 хувиар үнээ нэмсэн бол "Хөтөлийн Цемент шохой" ХК задгай цементийн үнийг 26 хувиар, Монцемент ХХК уутай цементийг 27.3 хувиар, задгайг нь 30.6 хувиар,  Төв аймгийн Сэргэлэн суманд үйл ажиллагаа явуулдаг "Мөнхийн баянгал" ХХК 15 хувиар тус тус үнээ нэмжээ. Эдгээр ААН-үүдийг үнээ тогтвортой барьж зургадугаар сарын 1 хүртэл нэмэхгүй байх тухай санал солилцсон ч ТУЗ-ийн шийдвэрээр шийднэ гэсэн хариуг өгсөн байна. Тиймээс эдгээр ААН-үүдэд ШӨХТГ-ын шалгалт оруулахаар болжээ.

Дээрх ААН-үүд цементийн үнээ нэмсэн шалтгаанаа  цахилгааны үнэ нэмэгдсэнтэй холбоотой гэх тайлбарыг өгчээ.