Л.Энх-Амгалан: Багш нараа сайн, муугаар нь ялгаж байгаа мэт ойлгогдохоор ярьсандаа уучлалт хүсье

Өчигдөр /2022.03.10/ БШУ-ны сайд Л.Энх-Амгалангаас багш нарын суурь цалинг хэзээ нэмэгдүүлэх талаар тодруулсан. 

Харин тэрбээр энэхүү асуудлаар ярихдаа "сайн багш өндөр цалин авч, муу багш бага цалин авна"  гэх зүйлийг хэлсэн нь багш нар, олон нийтийн шүүмжлэлийг дагуулаад байгаа юм. 

БШУ-ны сайд Л.Энх-Амгалан уг асуудалтай холбогдуулан цахим хуудаснаа "Сурлагын ахиц гаргаж байгаа багш өндөр цалин авна. Тодорхой үр дүн харагдахгүй байгаа багш бага цалин авна гэдэг ажлын үр дүнд суурилсан тогтолцоо хамгийн зөв хандлага, шударга жишиг тогтооно. Багшийн ажлын үнэлэмж өндөр байх ёстой.Гэхдээ хамгийн шударга зарчим бол үр дүнд суурилсан цалингийн тогтолцоо. Багшийн цалингийн доод жишгийг Засгийн газар баталсан. Одоо шатлалаар биш үр дүнгээр цалин нэмэгдэнэ. Харин хэвлэлд ярилцлага өгөхдөө багш нараа сайн, муугаар нь ялгаж байгаа мэт ойлгогдохоор ярьсандаа уучлалт хүсье. Алдаа гаргасан бол залруулж, буруугаа хүлээх нь ёс зүйн хүлээх ёстой үүрэг минь юм" гэжээ.