"Говь" ХК-ийг анхаарал хандуулах зээлийн ангилалд оруулжээ

"Говь" ХК  2019 оны зургадугаар сарын 14-ний өдөр Хөгжлийн банкнаас 82 тэрбум төгрөгийн зээл авч, нийт үлдэгдэл өнөөдрийн байдлаар  76.5 тэрбум төгрөг байна. Тус компани Хөгжлийн банкны хэвийн зээлдэгчдийн жагсаалтад багтаж байсан боловч үндсэн зээлийн төлөлтийн хугацаа хэтрэлт үүссэн тул анхаарал хандуулах зээлийн ангилал руу шилжжээ. 

Зээл төлөлт 90 хүртэл хоногийн хэтрэлттэй тохиолдолд зээлийн мэдээллийн сангийн анхаарал хандуулах ангилалд оруулдаг.

Түүнчлэн "Говь" ХК зээл авахдаа 367 мянган кг ноолуурыг 18 тэрбум төгрөгөөр үнэлж,  мөн ирээдүйд бий болох 5.2 тэрбум төгрөгийн хөрөнгийг барьцаалсан байна. Тус компанийн барьцаа хөрөнгийг дахин үнэлэхэд барьцаа хөрөнгийн чанар 2 дахин буурсан гэж үзжээ.

Хөгжлийн банкны нийт актив нь 3.2 их наяд төгрөг. Харин үүнээс 55.4% буюу 1.6 их наяд нь найдваргүй зээлдэгчдийн гарт орсон байгаа юм. Өнөөдрийн байдлаар чанаргүй зээлдэгчид нийтдээ 78 орчим тэрбум төгрөгийг эргэн төлжээ.