ЗГ: Хөгжлийн банктай холбоотойгоор зарим асуудлыг нууцаас гаргана

Зөрчлийн тухай хуулийг иргэд, олон нийт торгох зарчмаар хариуцлага ногдуулдаг гэж шүүмжилдэг. Тэгвэл жил гаруйн хугацаанд уг хуульд өөрчлөлт оруулах талаар судалсны үндсэн дээр зөвлөн тусладаг байхаар хэлэлцэж байгаа гэдгийг ЗГ-ын гишүүн, Хууль зүй дотоод хэргийн сайд Х.Нямбаатар хэллээ.Мөн өнөөдрийн Засгийн газрын хуралдаанаар Хөгжлийн банкны шалгалтын материалыг нууцаас гаргаж олон нийтэд дэлгэхээр боллоо. 

Энэ талаар тэрбээр "Хөгжлийн банкинд 2016 онд Засгийн газраас хийсэн шалгалтын 130 хуудас материалыг нийтэд ил болгохоор боллоо. Энэхүү материалд эх үүсвэрээс татан төвлөрүүлсэн мөнгийг ямар байдлаар зээл болгож гаргасан, ямар эх үүсвэрийг ноцтой анхааруулж дүгнэлт гаргасан, ямар зээл авсан эздийг нь тухайн үед хууль хяналтын байгууллагад шилжүүлсэн, өнгөрсөн зургаан сарын хугацаанд энэ хэргүүд хэрхэн шийдэгдэж, өр төлбөр барагдсан, шалгалтын үр дүнгийн дагуу холбогдох байгууллагууд арга хэмжээ авч ажилласан бол өнөөдрийн нөхцөл байдал үүсэх байсан уу зэрэг мэдээллүүдийг ил болгож байна.

Тухайн үед энэ материалыг нууц болгосон шалтгаан нь ОУВС-ийн өргөтгөсөн хөтөлбөр. Тус хөтөлбөрт орох хэлэлцээр тухайн үед хийгдэж байсан учир доноруудад өөрсдийнхөө Хөгжлийн банкны алдааг ил болгох нь хөтөлбөрт ороход эрсдэлд орох байсан учир улсын нууцад хамруулсан" гэлээ.