Б.Лхагвасүрэн: SWIFT-ийн хоригт орсон ОХУ-ын банкуудаар манай банкуудын гадаад төлбөр тооцоо дамждаг бол зогсох эрсдэлтэй

Олон улсын банк хоорондын мэдээлэл солилцооны систем SWIFT-ээс ОХУ-ын зарим банкыг хасах болсон тухайгаа АНУ, Европын холбоо, Их Британи, Канад зэрэг улсууд мэдэгдсэн.  Одоогоор барууны компаниудтай хамтран ажиллахыг хориглож, хориг арга хэмжээ авсан Оросын ВТБ, “Промсвязьбанк”, “Совкомбанк”, “Открытие”, “Новикомбанк” гэсэн банкнууд энэ хориг арга хэмжээнд өртөөд байна. Харин “Сбербанк” хэсэгчилсэн байдлаар өртөөд буй. Эдгээр банкнуудыг олон улсын түвшинд доллароор гүйлгээ хийх  боломжгүй болгожээ. Үүнтэй холбоотойгоор Монгол Улсын  ОХУ-тай хийдэг  худалдаа,үйлчилгээний төлбөр тооцоонд асуудал үүсэх эсэхийг Монголбанкны ерөнхийлөгч Б.Лхагвасүрэнгээс сэтгүүлчид тодрууллаа. 

Тэрбээр "Манай улс Оросын холбооны улсаас нефть бүтээгдэхүүнээ 100 хувь авдаг учраас эрсдэл үүснэ. Мөн тослох материал, эрчим хүч, үйлдвэрийн голлох материалуудаа ОХУ-аас авдаг. Хоёрт, манай улс нефть бүтээгдэхүүний төлбөр тооцоогоо олон улсын SWIFT системээр дамжуулан хийдэг. ОХУ-ыг энэ системээс хасах хоригт оруулж, хаалт хийсэн.ОХУ-ын Төв банк болон нэр бүхий таван том банкийг SWIFT системээс хассан гэж мэдэгдсэн. Хэрвээ манай улсын төлбөр тооцоо дамждаг банк үүнд багтсан бол гадаад төлбөр тооцоо зогсох эрсдэлтэй байдал гарна.  АНУ-ын талаас эрчим хүч, нефтийн төлбөр тооцоог хоригт багтаахгүй гэсэн мэдээлэл байна. Тиймээс нефть бүтээгдэхүүн авдаг манай улсын хувьд боломж гарц гаргалгаа байх боломжтой гэж харж байгаа. 

Өнөөдөр үдээс хойш Санхүүгийн тогтвортой байдлын зөвлөл /Сангийн яам, Монголбанк, Санхүүгийн зохицуулах хороо/ яг эдгээр асуудлаар хуралдаж, тодорхой ярилцана. 

Манай улс ОХУ-аас нефть бүтээгдэхүүн авахаас гадна Зүүн Европоос ОХУ-аар дамжин Алтанбулаг боомтоор хүнс болон хэрэглээний бараа бүтээгдэхүүн оруулж ирдэг. Энэ сүлжээнд мөн тодорхой хэмжээний эрсдэл үүсч байгаа.  Туркээр дамждаг нэг зам, Беларусаар буюу хойгуур дамждаг нэг зам бий. Одоогоор эдгээр сүлжээ доголдсон, экспорт, импортыг хаасан зүйл алга "гэлээ.