ГХЯ: Киев хотын орох гарах замуудыг хаасан тул татан авах ажиллагааг хойшлуулахаас аргагүй боллоо

ГХЯ-наас цаг үеийн асуудлаар дараах мэдээллийг өглөө.  

ГХЯ-ны Консулын захирлын үүрэг гүйцэтгэгч Б.Болд: Украины Харьков хотод  манай улсын нийи 18 оюутан, байнгын оршин суугч дөрвөн иргэн байна. Киев хотод 12 оюутан байнгын оршин суугч гурван байна. Харьков хотод байгаа оюутнууд хорогдох байранд байсан. Өнөөдөр зарим оюутан хорогдох байрнаас гарч өөр байранд очсон байна. Харьцангуй нөхцөл байдал тогтвортой байна. Киев хот дахь оюутнууд оюутны байрандаа байгаа. Львов хотод суралцдаг нэг оюутан Украинд түр хугацаагаар зорчиж байсан гурван монгол иргэний хамт өнөөдөр өглөө 11 цагийн орчимд  Польш улсын хилээр нэвтэрсэн. Польш улс 15 хоногийн хугацаанд виз шаардахгүй хил нэвтрүүлнэ гэдгийг мэдэгдсэн.  Бид хүсэлтээ тус улсад илэрхийлсэн. Тухайн дөрвөн иргэнийг Варшавт тосч, Монгол Улс руу татан авна. ГХЯ-наас энэ сарын 26, 27-нд 21 оюутнаа татаж авахаар төлөвлөж тасалбар захиалсан байсан боловч харамсалтай нь нислэгүүд цуцлагдсан гэсэн мэдээлэл ирсэн. Иймд иргэдээ газраар татан авах хувилбарыг ярьж байна.

Киев хотын орох, гарах замуудыг хаасан тул татан авах ажиллагааг нөхцөл байдал намжтал хойшлуулахаас өөр аргагүй боллоо" гэв.