Б.Эрдэнэбат: ЗГ төслөө хэрэгжүүлээгүйгээс бид зээлээ төлж чадахгүйд хүрсэн, бид зээлийг зориулалтаар ашигласан

"Эрэл"-ийн Б.Эрдэнэбат Хөгжлийн банкнаас ямарч барьцаа хөрөнгөгүйгээр авсан зээлээ төлөөгүй  зээлдэгчдийн нэг. 2019 онд хийсэн "Хөгжлийн банк"-ны шалгалтын ажиллагааны хүрээнд “Эрэл” компанийн захирал Б.Эрдэнэбат, түүний эхнэр Даваахүүгийн Сэргэлэн нар Хөгжлийн банкнаас  ямар ч барьцаагүй 23 сая ам.долларын зээл авсныг нь илрүүлсэн билээ. Энэхүү 23 сая ам.долларын зээлийг авахдаа эхлээд 14 сая ам.долларыг, дараа нь есөн сая ам.долларын зээлийг авсан байдаг. 

Уг зээлийг авахдаа дэлхийн стандартад нийцэх блокын үйлдвэр барина гээд ямар ч барьцаа хөрөнгөгүйгээр авсан хэдий ч өнөөдөр Эрэлийн Эрдэнэбатын Хөгжлийн банкинд төлөх өрийн хэмжээ 163.1 тэрбум. 

Хөгжлийн банкнаас зээл авсан “Эрэл” компани  мэдээлэл хийж байна. Тэрбээр “Эрэл” компанийн ТУЗ-ийн дарга Б.Эрдэнэбат "2013 оны тавдугаар сард Засгийн газраас Улаанбаатар хотын иргэдийг орон сууцжуулах тогтоол гаргасан. Чингис бондын эх үүсвэрээс 13 сая ам.долларыг Эрэл компанид олгохоор болсон. Ингэхдээ гэр хорооллын 180 мянган өрхийг орон сууцжуулж тухайн үеийн ханшаар худалдаж авахаар тохирсон. Улмаар манай компанид найман жилийн хугацаатай 14 сая ам.долларыг өгсөн. Би бондоос тухайн үеийн ханшаар 20 тэрбум төгрөгийн зээл авсан. Энэ зээл 2020 оны найман сард хугацаа нь дууссан. Би дараа нь 2014 онд 13.1 сая еврогийн зээлийг Хөгжлийн банкаар дамжуулан Германы банкнаас авсан. Дараа нь 2015 онд 9 сая ам.долларын зээлийг Хөгжлийн банкнаас авсан. Энэ нь Засгийн газрын тогтоолоор олгогдсон. Энэ зээлийн хугацаа 2022 оны аравдугаар сард дуусна. Ингээд нийт Хөгжлийн банкнаас гурван удаа зээл авсан.

Засгийн газраас тогтоолоо хэрэгжүүлсэн бол бид зээлээ бүрэн төлөх боломжтой байсан. Сүүлдээ манай компани зээлээ төлж чадахгүй тул 268 тэрбум төгрөгийн үнэлгээтэй үйлдвэрээ Хөгжлийн банкны барьцаанд өгсөн. Намайг зээлээ төлсөнгүй гэх биш анхнаасаа тогтоолоо хэрэгжүүлээгүй Засгийн газарт хариуцлага тооцох хэрэгтэй" гэв.