Д.Сумъяабазар: Ард түмэндээ үнэнээ хэлье, нэг хэсэгтээ түгжирнэ, бид түгжрэлийг бууруулах гашуун шийдвэрүүдийг удахгүй гаргана

Улаанбаатар хотын түгжрэлтэй холбоотой асуудлаар Хотын дарга Д.Сумъяабазараас сэтгүүлч Н.Өнөрцэцэг тодрууллаа.

Хотын дарга Д.Сумъяабазар: Иргэдийн төлөөлөгчийн чуулган удахгүй хуралдана. Улсын хэмжээнд бүртгэлтэй 665,000 тээврийн хэрэгсэл бий. Жилд 80 мянган тээврийн хэрэгсэл нэмэгдэж байна. Харин жилд замын бүтээн байгуулалт 35-50 километр замаар л нэмэгддэг. Тэгэхээр ухаалаг удирдлагын системтэй болох хэрэгтэй байна.Шинэ нийтийн тээвэр,  тойрог хурдны зам, бусад холбоос замууд хэрэгтэй байна. Зогсоолыг ч төлбөртэй болгох ёстой. Түгжрэл бол төвлөрөлтэй холбоотой. Хүн амын хэт их төвлөрөлтөд зөвхөн автомашины хязгаарлалт хийгээд шийдэгдэхгүй. ШУ-ны үндэстэй, ул суурьтай шийдэх хэрэгтэй байна.  Ард түмэндээ үнэнээ хэлье, төв зам болон бусад замын хураамжийг ч нэмэгдүүлж л таарна. Ялангуяа хөдөө орон нутгаас орж ирж буй машинуудын хураамжийг нэмэгдүүлнэ. Тэгэхээр бидэнд хяналтын камер хэрэгтэй, цахим шилжилтын процессоо ч яаруулах шаардлагатай.  Буруу хүрдтэй машины импортыг зогсооно. Нэг хэсэгтээ түгжирнэ, бид түгжрэлийг бууруулах гашуун шийдвэрүүдийг удахгүй гаргана. Түгжрэлийг бодитой бууруулахын тулд хөрөнгө, мөнгөө шийдэх хэрэгтэй.