Ё.Отгонбаярыг Эрүүгийн цагдаагийн албанаас шалгаж эхэлжээ

БСШУ-ны сайд асан Ё.Отгонбаяр эхнэрийнх нь хамаарал бүхий компани Хөгжлийн банкнаас зээл авсан гэх манай сайтад гарсан мэдээлэлтэй холбогдуулан твиттерт жиргэсэн сэтгүүлчийг "чамайг олж ална, заригтай чинь хамт ална" хэмээн заналхийлсэн. Сэтгүүлчийг заналхийлсэн Ё.Отгонбаярыг МАН-ын даргын ахлах зөвлөхийн ажлаас нь чөлөөлөөд байгаа юм.

 Өөрийг нь заналхийлсэн уг асуудлаар сэтгүүлч У.Оргилмаа цагдаагийн байгууллагад гомдол гаргаад байсан юм. Сайд асан Ё.Отгонбаярыг сэтгүүлч У.Оргилмаагийн гомдлоор Эрүүгийн цагдаагийн албанаас хэрэг бүртгэлтийн хэрэг нээн шалгаж эхэлжээ.

Эргэн сануулахад “Мондулаан трейд ХХК”. Баянголын ам дахь Зүүн шанд, Улааншивэртийн амны алтны шороон ордыг ашиглах төслийг хэрэгжүүлэхээр 2018 оны 10 дугаар сард Хөгжлийн банкнаас 13.7 тэрбум төгрөгийг авсан бөгөөд хуримтлагдсан өр төлбөрийн хэмжээ өнөөдрийн байдлаар 17.7 тэрбумд хүрчээ.“Мондулаан трейд” компанийн хувьцаа эзэмшигчдийн нэг нь “Нүүдэлчин групп” ХХК юм. Тус компанийн хувьцаа эзэмшигч Шүхэртийн Батнасан нь БСШУЯ-ны сайд асан Ё.Отгонбаярын эхнэр юм. “Нүүдэлчин групп” ХХК-ийн гүйцэтгэх захирлаар Ё.Отгонбаярын эхнэрийн эгч Ш.Бүтэд, түүний аав Б.Шүхэрт, хувьцаа эзэмшигчээр Шүхэртийн Жаргал, Шүхэртийн Лхамсүрэн нар  ажилладаг үндсэндээ гэр бүлийн компани. Тус компани 2019 онд “Мондулаан трейд” компанийн хувьцаа эзэмшигчдээс хасалт хийлгэсэн бүртгэл байдаг.