МАН-аас Г.Солтан, Б.Ундармаа, Д.Дамба-Очир, Б.Батзориг, Д.Хаянхярваа нарыг хаслаа

МАН-ын Хяналтын ерөнхий хороо өнөөдөр /2022.02.18/ хуралдаж, гарсан шийдвэрийн талаар тус хяналтын хорооны дарга Б.Баярбаатар мэдээлэл хийлээ.

Тэрбээр  "МАН-ын гишүүн цаг хугацаанаас үл хамаарч авлигын хэрэгт холбогдсон бол бүх шатны сонгуульд нэр дэвшихгүй байх, мөн  МАН-аас  улс төрийн өндөр дээд албан тушаалд томилогдон ажиллаж байхдаа авлига, албан тушаалын хэрэгт яллагдагчаар татагдсан тохиолдолд  намын гишүүнээс түдгэлзүүлэх хүсэлтээ 30 хоногийн дотор ирүүлэх, хэрэв уг хүсэлтээ 30 хоногийн дотор ирүүлээгүй тохиолдолд МАН-ын Хяналтын ерөнхий  хороо хуралдаж түдгэлзүүлэх, гуравдугаарт, хуулиар авлигад холбогдсон нь тогтоогдвол намын гишүүнээс хасах шийдвэр ийм гурван заалт намын дүрэмд орсон. 

МАН Их хурлаараа авлигын эсрэг дэвшилтэт  бодлого дэвшүүлж, хүний эрхийг дээдэлж дэвшилтэт нам болохоо зарласан. Энэ хүрээнд намын дүрэмдээ сахилга хариуцлагын асуудлыг оруулсан нь  улс төрийн намуудаас анхдагч болж байна.Манай намын дүрмийн өөрчлөлтийг ес хоногийн өмнө Дээд шүүх бүртгэсэн.  Өнөөдрийн хурлаар хэлэлцсэн эхний асуудал нь намаас хасах тухай байлаа. Бусдад давуу байдал олгож, авлига авч албан тушаалаа ашиглаж, ял шийтгэл эдэлж байсан бол намаас хөөх шийдвэр гаргасан. УИХ-ын гишүүн асан  Г.Солтан, Б.Ундармаа, Д. Дамба-Очир,  Б.Батзориг, Д.Хаянхярваа нарын таван хүнд улс төрийн хариуцлага тооцож,  намаас хассан" гэлээ.