Төрийн албаны ерөнхий шалгалтын бүртгэл эхэллээ

Төрийн албаны 2022 оны эхний ерөнхий шалгалтыг 2022 оны 4 дүгээр сарын 01-ний өдрөөс эхлэн зохион байгуулахаар Төрийн албаны зөвлөлийн хуралдаанаас шийдвэрлэсэн.

Шалгалтын бүртгэл  2022 оны хоёрдугаар сарын 17 буюу өнөөдөр 09:00 цагаас гуравдугаар сарын 19-ний 09:00 цаг хүртэл 30 хоногийн хугацаатай цахимаар явагдана.

Бүртгэлийн эцсийн шатанд үйлчилгээний зардлаа ямарч банкны аппликэйшнээр QR кодыг уншуулж төлөөд илгээх дарсны дараа "Бүртгэлд хамрагдсан иргэд" цэсэнд РД дугаараараа хайж бүртгэлээ нягтлах юм байна. 
Өмнө шалгалтад орж байсан хүмүүс өөрийн эрхээрээ ороод мэдээллээ илгээх, хураамжаа төлнө. Нууц үгээ мартсан бол и-мэйл, дугаартаа код аваад бүртгэлээ сэргээх боломжтой аж. 
Төрийн албаны зөвлөлөөс бэлтгэн 2020, 2021 онд хэвлүүлсэн Төрийн албаны шалгалтын сорилын ном, E-TAZ аппликэйшнээс /үнэгүй татна/ шалгалтадаа бэлтгэх, өөр ном, бусад төлбөртэй апп-ын агуулга, тест шалгалтад ирэхгүй болохыг анхааруулж байна. 

Төрийн албаны энэ удаагийн ерөнхий шалгалтыг мэргэжлийн байгууллагуудын зөвлөмжийн дагуу халдвар хамгааллын дэглэмийг чанд баримтлан, аймаг, нийслэлийн Салбар зөвлөл, Төв болон салбар комисс, олон нийтийн хяналт дор зохион байгуулна.

 Иргэд төрийн алба хаах адил тэгш боломжоор хангагдах төрийн албаны зарчмыг хэрэгжүүлэх бололцоог илүү бүрдүүлэх, олон нийтийн оролцоог шалгалтын үйл явцад идэвхжүүлэх зэрэг багц асуудлыг судлан хэрэгжүүлж, төрийн жинхэнэ албаны шалгалтын шинэтгэлийг цаашид улам эрчимжүүлэхээр Төрийн албаны зөвлөл ажиллаж буй.