УИХ-ын гишүүн Ц.Анандбазарыг “мөнгө угаах” гэмт хэргээр шалгаж байна

УИХ-ын гишүүн Ц.Анандбазарын эзэмшдэг “Сод Монгол групп” ХХК Хөгжлийн банкнаас 2017 оны наймдугаар сарын 24-ны өдөр 669.8 сая иен буюу 3.6 тэрбум төгрөгийн зээл авсан байдаг. Улмаар уг зээлээ өнгөрөгч Пүрэв гаригт /2022.02.10/ буюу "Өөрөөр нь төлүүлье" хэлэлцүүлгийн өмнөх өдөр нь төлж барагдуулсан. 

Тэгвэл уг зээлийг Эрүүгийн хуулийн мөнгө угаах гэмт хэргийн шинжтэй байж болзошгүй гэж үзэн УИХ-ын гишүүн Ц.Анандбазарыг шалгаж эхэлжээ.

Учир нь Засгийн газар Хөгжлийн банкны зээлдэгч нарыг хоёр төрлөөр авч үзэн гэдгээ мэдэгдсэн. Нэгдүгээрт, зээлийг зориулалтын дагуу ашигласан, барьцаа хөрөнгө нь хангалттай тухайн төсөл Монгол Улсын хөгжилд тодорхой хувь нэмэр оруулсан ийм төслүүд цар тахлын улмаас эргэн төлөлт  нь бага  хугацаагаар тасалдсан тохиолдолд хэвийн зээл гэж үзэх.

 Хоёрт, улс төрийн нөлөөллөөр барьцаа хөрөнгөгүйгээр авсан зээлээ зориулалтын бусаар зарцуулсан хүмүүст Эрүүгийн хуулийн дагуу мөнгө угаах гэмт хэрэгт шалгах хүсэлтийг Засгийн газраас Ерөнхий прокурорт гаргасан гэдгийг Ерөнхий сайд Л.Оюун-Эрдэнэ мэдээлсэн.  Энэ дагуу УИХ-ын гишүүн Ц.Анандбазарыг мөнгө угаах гэмт хэрэг үйлдсэн байж болзошгүй гэж шалгаж эхэлсэн гэсэн мэдээлэл байна.

Түүнчлэн  өнөөдрийн байдлаар Хөгжлийн банктай холбоотой Авлигатай тэмцэх газраас шалгаж байгаа хэрэг бүртгэлтийн ес, мөрдөн байцаалтын дөрөв, Цагдаагийн байгууллагаас шалгаж байгаа гурван хэрэг тус тус Прокурорын хяналтад байна.