Д.Амарбаясгалан: Хөгжлийн банкны асуудлаар ХХБ, Улаанбаатар хотын банкыг шалгах шаардлагатай

Хөгжлийн банкнаас авсан зээлээ төлөөгүй ААН-үүдийг зээлээ төлөхийг шаардах зорилгоор зохион байгуулсан  "Өөрөөр  нь төлүүлье” хэлэлцүүлгийн төгсгөлд МАН-ын генсек Д.Амарбаясгалан дараах байр суурийг илэрхийлээ. 

Тэрбээр "Ерөнхий сайд Хөгжлийн банкны зээлийн асуудлыг нягталж, шалгаж үр дүнд хүргэх чиглэлийг  АТГ-т шилжүүлсэн. Энэ үр дүнгээр АТГ 52 ААН-ийн зээлийг шалгаж нягтлах шаардлагатай гэж үзсэн байна лээ.  Мэргэжлийн байгууллагууд нь хянаж шалгаж, бүх талаасаа тодорхой болно. Хөгжлийн банкны ТУЗ-д ажиллаж байсан шат шатны удирлагууд, захирал нь хариуцлага хүлээх болов уу гэж бодож байна.  Хөгжлийн банкны ТУЗ-ийн даргаар хоёр ч удаа улиран ажиллаж байсан нөхөр Эрдэнэтийн ТУЗ-д  ажиллаад явж байсан гэдэг асуудал гарч ирж байсан. Үүнийг ч мөн нягтлах ёстой. Улаанбаатар банкны захирлаар ажиллаж байсан нөхөр Хөгжлийн банкны ТУЗ-ийн гишүүн болсон тухай хүртэл мэдээлэл байсан. Үүнийг мөн нягтлах ёстой. Хөгжлийн банкны байгаа боломжийг Улаанбаатар банк, Худалдаа хөгжлийн банканд төвлөрүүлээд том зээлүүдийг санхүүжүүлнэ гээд яриад явж байх жишээний. Энэ бүхнийг нягталж, шалгасны үндсэн дээр хэн, ямар хариуцлага хүлээх ёстой вэ гэдгийг тодорхой болгох ёстой. Түүнээс биш эрх барьж байгаа нам гэдэг ч юм уу эсвэл дан ганц Ерөнхий сайд, Засгийн газар тэрийг яллана гээд ярихад учир дутагдалтай" гэлээ.

 Хөгжлийн банк 2012 оноос өнөөдрийг хүртэлх хугацаанд нийт 70 орчим аж ахуйн нэгжид 3,2 их наяд төгрөгийн зээл олгож 55,3 хувь нь чанаргүй зээлийн ангилалд шилжсэн. Үүнтэй холбоотойгоор  28 зээлдэгчийн 1 их наяд орчим төгрөгийн зээлийг шүүхэд шилжүүлсэн. Мөн 52 зээлдэгчийг АТГ-аас шалгаж энэ хүрээнд 186 үл хөдлөх хөрөнгө, 124 машин, нэг үйлдвэр, нэг лиценз, 13 дансыг битүүмжилж, хязгаарласан талаар АТГ-аас  өчигдөр /2022.02.10/ мэдээлсэн.

Түүнчлэн Хөгжлийн банкнаас 20 зээлдэгч 520 тэрбум төгрөгийг зориулалт бусаар зарцуулсан нь нотлогдсон билээ.