Д.Амарбаясгалан: Валютын ханшийн зөрүүнээс сард хэдэн тэрбум төгрөгийн ашиг олдог бүлэглэлтэй ч тэмцэнэ

"Өөрөөр  нь төлүүлье” хэлэлцүүлэг үргэлжилж байна. Энэ үеэр МАН-ын генсек Д.Амарбаясгалангаас хэлэлцүүлэгт оролцогчид  "Хөгжлийн банкны үнэн төрхийг ил хуулсан нь цаанаа МАН-ынхан дунд зөрчил байна уу гэдгийг тодруулав. 

Уг асуултад  МАН-ын генсек Д.Амарбаясгалан хариулахдаа тэрбээр " МАН эв нэгдэлтэй байгаа. Гэхдээ Хөгжлийн банкны луйвар гэдэг юм уу, олон нийт, улс орны эрх ашгийг зөрчсөн үүнийг давсан  эв нэгдэл гэж бас байж болохгүй. Ард иргэдийн боломжийг хулгайлж, луйвардаж дээрэмдэж  байгаа  хэсэгтэй бид эвлэрэхгүй гэдгээ намынхаа Их хурал дээрээ ч зарласан. Зарим хулгай луйврыг таслан зогсоохын төлөө ажиллана. МАН бизнес эрхлэгчдийг дэмжиж ажиллахад анхаарлаа хандуулж ажиллаж байна.

 Дан ганц Хөгжлийн банк бус татвар төлөгчдийн мөнгийг үрэн таран хийдэг, угаадаг, эргэлдүүлдэг, валютын ханшийн зөрүүг хүртэл угааж нэг сарын дотор хичнээн тэрбум төгрөгийн ашиг олдог хэсэг ч бий болчихсон. Үүнийг ч таслан зогсоох эр зоригийг гаргах ёстой гэж МАН үзсэн. Үүний ард ямар нэгэн улстөрчдийн хоорондын тэмцэл, нам хоорондын зөрчил мэтээр улс төрийн жижигхэн эрх ашиг ярьж бие биеийнхээ үйл ажиллагааг сарниулах нь зохимжгүй. Бид мэдэгдэл хийж бусдыгаа уриалан дуудсан, үр дүнг ард түмэн харна" гэлээ.