Л.Энх-Амгалан: Хөгжлийн банкны чанаргүй зээлүүд бүгд ЗГ, УИХ-ын тогтоолгүй гарсан байдаг

Хөгжлийн банкнаас авсан зээлээ төлөөгүй ААН-үүдийг зээлээ төлөхийг шаардах зорилгоор зохион байгуулж буй "Өөрөөр  нь төлүүлье” хэлэлцүүлэг үргэлжилж байна.  Хэлэлцүүлгийн үеэр БШУ-ны сайд Л.Энх-Амгалан 2015 онд Хөгжлийн банканд хийж байсан шалгалтын талаар танилцууллаа. 

Тодруулбал, 2015 онд УИХ-ын  Эдийн засаг, Төсвийн байнгын хорооноос Хөгжлийн банкыг шалгах ажлын хэсэг байгуулж, шалгалт хийж байсан. Энэ шалгалтын ажлын хэсгийн ахлагчаар УИХ-ын гишүүн Л.Энх-Амгалан ажиллаж байв. 

Уг шалгалын талаар тэрбээр хэлэхдээ "Өнөөгийн ярьж байгаа бүх асуудлыг бид тухайн үеийн шалгалтаар гаргаж ирсэн. Самурай бондын мөнгө дутуу орж ирсэн байсан. Үүнд тусгайлан аудитын дүгнэлт гаргуулах шаардлагатай гэж үзсэн ч харамсалтай нь энэ дүгнэлт гаргаагүй. Өнөөдөр ил болсон чанаргүй зээлүүдэд ЗГ, УИХ-ын тогтоолгүй гарсан байдаг. Тухайлбал, Хөтөлийн цемент шохойн өргөтгөл, Яармагийн орон сууцны хорооллын санхүүжилтийг Засгийн газрын тогтоолгүй олгож зөрчил гаргасан байсан. Хөгжлийн банкны олгосон зээлүүд  Монгол банкны зээлийн мэдээллийн санд бүртгэгдээгүй учир зээлийг зориулалтын бусаар ашиглах, бондын мөнгийг зүй бусаар зарцуулах, бондын хөрөнгийг мөнгө хүүлэх хэрэгсэл болгох цаашид банкны системийн зээлийн чанарт сөрөг нөлөө үзүүлэх нөхцлийг бий болгох нь  гэж дүгнэсэн.  

Хэрэв Монгол банкны зээлийн мэдээллийн санд бүртгэж байсан өнөөдрийн нөхцөл байдал үүсэхгүй байсан. Тухайн үед 1.5 тэрбум төгрөгийн Самурай бондыг Худалдаа хөгжлийн банк, Улаанбаатар хотын банканд  байршуулсан байсан. Тухайн үеийн хадгаламжийн хүү нь бусад банкны хадгаламжийн хүүнээс 2.5-3 функетээр бага байршуулсан байсан. Энэ мэт дүгнэлтийг бид шалгалтаар гаргаж тавьсан. Уг тайланг тухайн үед УИХ-аар хэлэлцхээр оруулсан боловч эрх барьж байсан АН авч хэлэлцээгүй учраас МАН-ын цөөнх гишүүд  АТГ-т дүгнэлтээ өгч байсан. Ингээд 2016 онд манай нам олонх болоод дээрх ажлын хэсгийн дүгнэлтийг Ж.Эрдэнэбатын Засгийн газарт хүргүүлсэн. Үүний дараа одоогийн УИХ-ын гишүүн Б.Энхбаяраар ахлуулсан ажлын хэсгийг байгуулахад бидний хийсэн өмнөх шалгалттай адилхан дүгнэлтийг гаргаж байсан" гэлээ.