УИХ-ын гишүүн Н.Алтанхуяг "Өөрөөр нь төлүүлье” хэлэлцүүлэгт оролцохоос татгалзав

Хөгжлийн банкнаас авсан зээлээ төлөөгүй ААН-үүдийг зээлээ төлөхийг шаардах зорилгоор "Өөрөөр нь төлүүлье” хэлэлцүүлгийг сэтгүүлчид хоёрдугаар сарын 11-нд буюу маргааш /2022.02.11/ 11 цагаас "Туушин" зочид буудалд зохион байгуулна. Уг хэлэлцүүлэгт УИХ-ын гишүүн Н.Алтанхуягийг  оролцоно  уу хэмээн урьсан боловч тэрбээр оролцохоос татгалзсан хариу өглөө.

УИХ-ын гишүүн Н. Алтанхуяг 2012 оны наймдугаар сарын 9-нөөс 2014 оны аравдугаар сарын 5-ныг хүртэл Засгийн газрын тэргүүнээр ажилласан. Түүнийг Ерөнхий сайд байх хугацаанд Хөгжлийн банкны захирлаар Н.Мөнхбат 2012-2016 онд ажиллаж, энэ  хугацаанд нийтдээ 960 тэрбум төгрөгийн чанаргүй актив Монголбанкны шалгалтаар тогтоогдсон.

Тодруулбал,  Н.Алтанхуягийн Засгийн газрын үед Хөгжлийн банк 1 их наяд орчим төгрөгийн зээлийг "Эрэл" ХХК, "Капитал" банк, "Мон лаа" ХХК, "Чингис хаан" банканд тус тус олгож байв.