АТГ: Б.Ундармаагийн хамаарал бүхий "Гантиг Вилла" хотхоны есөн блок барилгыг битүүмжилсэн

Хөгжлийн банкнаас авсан зээлээ төлөөгүй 52 аж ахуйн нэгжийг АТГ-т шалгалж байна. Энэ дагуу Авлигатай тэмцэх газраас Хөгжлийн банкны чанаргүй зээлийн асуудлаар мэдээлэл хийж байна.

Тэрбээр"Хөгжлийн банкны чанаргүй зээлийн талаар нэгдүгээр сарын 28-нд албан бичгээр ирүүлсэн гомдол мэдээллээр АТГ-аас хэрэг нээж, мөрдөн шалгаж байна. Энэ хугацаанд 8.5 тэрбум төгрөг эргэн төлөгдсөн байна. Мөрдөн шалгах ажлын хүрээнд 186 үл хөдлөх хөрөнгө, нэг лиценз, 13 дансыг битүүмжилж, хязгаарласан. Зээлээ эргэн төлөөгүй 52 иргэн, аж ахуй нэгжийг албан ёсны вэб хуудаст байршуулна.

Гантиг Вилла хотхоны есөн блок нь Хөгжлийн банкны барьцаанд байгаа бөгөөд хууль хяналтын байгууллагаас хязгаарлалт тогтоосон. Гантиг Вилла хотхон нь УИХ-ын гишүүн асан Б.Ундармаагийн хамаарал бүхий компанийн барьж байгуулсан хөрөнгө юм.

186 үл хөдлөх хөрөнгө, 124 тээврийн хэрэгсэл, 1 үйлдвэрийн барилга, 1 лиценз, 13 дансыг битүүмжилж захиран зарцуулах эрхийг хязгаарласан" гэв.

Эргэн сануулахад

Хөгжлийн банкны чанаргүй зээлдэгч нарын жагсаалт Капитал банкийг дампууруулсан Б.Ундармаагийн хамаарал бүхий хүмүүсээр үргэлжилж байна.

“Бишрэлт групп” ХХК-ийн гүйцэтгэх захирал А.Чинбишрэлт өөрийн эзэмшдэг “Бишрэлт пропертиз” болон “Веллмарт” ХХК-иудаараа дамжуулан “Монгол мах экспо” ХХК-тай хамтран Мах боловсруулах цогцолбор төв байгуулах төсөл хэрэгжүүлэхээр 2017 онд Хөгжлийн банкнаас 31.9 тэрбум төгрөгийн зээл авчээ. “Бишрэлт групп” ХХК-ийг А.Чинбишрэлт, А.Чинсанаа нар хамтран эзэмшдэг бөгөөд тэд Капиталаар овоглож ирсэн Б.Ундармаагийн хүүхдүүд юм.

Мөн Бишрэлт групп ХХК, “Монгол эм импекс концерн” ХХК-тай хамтран Хатуу тунгагдсан эм болон дуслын шингэний үйлдвэр байгуулах төслөөр 2018 онд 7.27 тэрбум төгрөгийн зээл авсан нь Хөгжлийн банкны чанаргүй зээлүүдийн үргэлжлэлийн нэг юм. Өмнө дурдсанчлан Бишрэлт групп ХХК-ийг Б.Ундармаагийн төрсөн хүү А.Чинбишрэлт, А.Чинсанаа нар хамтран эзэмшдэг бол “Монгол эм импекс концерн” ХХК-ийг Б.Ундармаагийн төрсөн дүү Б.Болормаа удирддаг юм.

Монгол төрөөс 340 тэрбумыг зувчуулаад алга болсон Б.Ундармаагийн луйвар үүгээр зогсохгүй нь бололтой. Түүний төрсөн дүү, төрсөн хүүхдүүд ч Монголын төрөөс хумсалж, найдваргүй зээлдэгчдийн нэг болж ард иргэдийн боломжийг хулгайлсаар байна.