Д.Амарбаясгалан: Хөгжлийн банкнаас дээрэм тонуул хийсэн зарим нөхөдтэй эвлэрч суухгүй, хатуу тэмцэнэ

"Хөгжлийн банк”-ны хэвийн үйл ажиллагаанд сөрөг нөлөө үзүүлсэн нэр бүхий чанаргүй зээлдэгчдийг зээлээ төлөхийг шаардах зорилгоор "Өөрөөр нь төлүүлье” хэлэлцүүлгийг сэтгүүлчид хоёрдугаар сарын 11-нд буюу Баасан гаригт  11 цагаас "Туушин" зочид буудалд зохион байгуулах гэж байна. 

  2012 оноос өнөөдрийг хүртэлх хугацаанд нийт 70 орчим аж ахуйн нэгжид 3,2 их наяд төгрөгийн зээл олгож 55,3 хувь нь чанаргүй зээлийн ангилалд шилжсэн. Үүнтэй холбоотойгоор нийт 28 зээлдэгчийн 1 их наяд орчим төгрөгийн зээлийг шүүхэд шилжүүлсэн. Мөн 52 зээлдэгчтэй холбоотой асуудал хууль хяналтын байгууллагад шалгагдаж байна. 

Хөгжлийн банкнаас авсан зээлээ төлөөгүй ААН-үүдээр зээлийг нь даруй төлүүлэх арга хэмжээг төрийн шат шатны байгууллагуудад үүрэгдүүлсэн. Энэ хүрээнд өнөөдөр /2022.02.09/ Засгийн газрын хуралдаанаар Ерөнхий сайд Л.Оюун-Эрдэнэ хуулийн байгууллагын удирдлагуудтай уулзаж тодорхой чиглэлүүдийг өгсөн. Түүнчлэн УИХ-ын ээлжит бус чуулганы хуралдаанаар Хөгжлийн банкыг шалгах ажлын хэсгийг байгуулж, мөн эрх баригч МАН-аас Хөгжлийн банкны чанаргүй зээлдэгчдийн асуудлаар албан ёсны мэдэгдэл гаргасан. 

Уг мэдэгдэлд  "Зээл авч зориулалтын бусаар ашигласан, санаатайгаар зээлээ төлөхөөс зайлсхийсэн, гэрээний үүргээ биелүүлээгүй аж ахуйн нэгжүүд болон эдгээр байгууллагад зээл авахад эрх мэдлээ урвуулан ашиглаж нөлөөлсөн улстөрчид, албан тушаалтнуудтай аль нам засгийн эрх барьж байсан, аль нам засгийн эрх барьж байгаагаас үл хамааран нам харгалзахгүй хатуу тэмцэх болно" гэж мэдэгдсэн. 

Тэгвэл энэхүү гаргасан мэдэгдэлдээ эзэн болохоо МАН-ын генсек Д.Амарбаясгалан дахин илэрхийллээ. Тэрбээр энэ тухайгаа "Гаргасан мэдэгдэлдээ эзэн болноо. Та бүхэнтэй хамтарч ажиллах уриалга ч гаргасан. Зохион байгуулах хэлэлцүүлэгт бид оролцоно, байр сууриа илэрхийлнэ. Улс төрийн намууд, иргэний нийгмийн байгууллагууд хамтраад энэ мэт дээрэм тонуултай хатуу тэмцдэг жишиг тогтоох хэрэгтэй. Улс орноо эзэнгүй мэт бодож дээрэм тонуул хийсэн зарим нөхөдтэй эвлэрч суух боломжгүй! Зөв бурууг нь тунгааж, улс орноо эрсдэлд оруулахаас урьдчилан сэргийлэхийн төлөө зүтгэнэ" гэв.