Иргэд Хөгжлийн банкны асуудлаар ҮАБЗ-д хандлаа

Хөгжлийн банкны чанаргүй зээлдэгч нарын асуудалтай холбоотойгоор иргэд Үндэсний аюулгүй байдлын зөвлөлийн гишүүд Монголын Улсын Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нарт шаардлага хүргүүллээ.

Д.Энхсайхан “Хөгжлийн банкны чанаргүй зээл болох 1.7 их наяд төгрөгийн асуудлаар Ерөнхийлөгч, УИХ-ын дарга, Ерөнхий сайд нарт хандан шаардлага хүргүүлж байна.

Энэ мөнгө хаашаа алга болсон бэ. Гадаадад хаус болсон байгаа, казино руу явсан, Монголд үнэтэй машин, хаус болсон байгаа гэж бодож байна.

Тиймээс Үндэсний аюулгүй байдлын зөвлөлийн тэргүүн У.Хүрэлсүхэд хандан 1.7 их наяд төгрөгийн дээрмийн асуудлаар ҮАБЗ-ийг яаралтай хуралдуулж, арга хэмжээ авна уу гэж шаардаж байна.

Хоёрдугаарт, УИХ-ын дарга Г.Занданшатар, Ерөнхий сайд Л.Оюун-Эрдэнэ нарт Нийтийн сонсголын тухай хуулийн дагуу эдийн засгийн асуудлаар нийтийн сонсгол зохион байгуулахыг шаардаж байна.