"Монполимет"-ын Н.Мөнхнасанг АТГ-аас шалгаж эхэлжээ

"Монполимет"-ын Н.Мөнхнасанг АТГ-аас шалгаж эхэлсэн байна. Тэрбээр, олон нийтийн сүлжээнд энэ тухай "Авлигатай тэмцэх газар чинь албан тушаалтануудын авилгалын хэргийг шалгадаг гэж бодсон чинь улс эх орондоо стратегийн үйлдвэр барьж өгсөн хөлс хүчээ дусааж явдаг хүмүүсээ шалгадаг юм байна. Миний ээж 2016 онд гишүүн болсон. Монцемент дээр зээл олгох тогтоол 2014 онд гарсан байдаг" хэмээн жиргэжээ.

"Монполимет ХХК" нь Хөгжлийн банкнаас 65 сая ам.долларыг 7.8 хувийн хүүтэй, 7 жилийн хугацаатай зээлжээ. Улмаар 2019 оноос хойш одоог хүртэл зээлээ огт төлөөгүй гурван жил болж байгаа бөгөөд зээлийнх нь хугацаа дууссан талаар Хөгжлийн банкнаас мэдээлж байгаа юм.

Хөгжлийн банк “Монполимет ХХК”-ийг шүүхдэхээр ажиллаж байгаа  компаниудын жагсаалтандаа оруулсан байна.Тус компанийн зээлийн үлдэгдэл 114 тэрбум төгрөг байгаа юм. Хөгжлийн банкнаас "Монполимет ХХК" -д барьцаа хөрөнгөөр зээлийг хангуулах гэтэл Гадаадын банкинд үйлдвэрээ тавьсан байна. Улмаар Хөгжлийн банкнаас үл хөдлөх барьцаа хөрөнгө хангалтгүй гэж үзээд байгаа юм.