Г.Мөнх-Од: Сэтгэлд “дулаахан”-аар дурсагдан үлдсэн манаач ахынхаа зургаар үзэсгэлэн гаргана гэж төсөөлөөгүй явсан

Хүн хоорондын нандин харилцааг илтгэх халуун дулаахан уур амьсгал шингэсэн нэгэн сурвалжилгыг Ардын эрх сонины шар байрнаас бэлтгэлээ. Амьдралынхаа олон жилийг Ардын эрхийн шар байранд манаач хийж өнгөрөөсөн инээд алдсан, найрсаг, зургийг нь үзэхэд л дотно санагдах н.Жаргалсайхан гэдэг эрэгтэй өнгөрсөн жил өөд болжээ. Тэрбээр амьдралынхаа эцсийн мөчийг хүртэл манаачийн ажлаа хийсэн.Түүний  дурсгалд зориулсан гэрэл зургийн  “Байхгүй, Байсан, Байна нэртэй үзэсгэлэнг баримтат гэрэл зурагчин Г.Мөнх-Од гаргажээ.

Г.Мөнх-Од н.Жаргалсайхан гуайн талаар “Гутлынхаа түрийнд утас, хөөрөгөө хийж н.Жаргалсайхан гуайн байгаа байдал  сонирхол татам хүн байсан” хэмээн дурсан ярьж байлаа.

“Ардын эрхийн шар байшин руу ормогц үүдэнд нь нүдний шилнийхээ дээгүүр харж, инээд алдсан эрэгтэй манаач мэндлэн угтана. Гэвч тэрбээр мөнх бусыг үзүүлээд нэг жил болох гэж байна. Шар гэрэл үргэлж асаалттай байдаг түүний өрөө харанхуй, бас түгжээтэй байлаа. Шар байшинд ажилладаг хүмүүсийн сэтгэлд дулаахан инээдээрээ хоногшин үлдсэн түүний орон зай үгүйлэгдэн үлджээ.”

“н.Жаргалсайхан гуайн суудаг байсан сандал, хамрын тамхи, уудаг кофег нь ч зургийн үзэсгэлэнгийн урд дэлгэн тавьсан байлаа. “

Хүн бүхний сэтгэлд тодоос тод гэрэлтэх зүрх сэтгэлтэй, сайхан хандлага, дулаан энергитэй хүн бий. Гэрэл зурагчин Г.Мөнх-Одын хувьд анхны бие даасан үзэсгэлэнгээрээ өөрийнх нь сэтгэлд дулааханаар үлдсэн манаач н.Жаргалсайхангийн дүрийг гэрэл зурагт мөнхөлжээ.