Өмнө нь залилангийн гэмт хэрэгт холбогдож байсан этгээд долоон настай охиныг хуурч авч явжээ

Хан-Уул дүүргийн 12 хорооны нутаг дэвсгэрээс долоон настай охиныг зүс таних эмэгтэй дагуулж явсан тухай мэдээлэл хоёрдугаар сарын 5-ны өдрийн 18:20 цагт Цагдаагийн байгууллагад бүртгэгдсэн талаар бид өмнө нь мэдээлсэн билээ.Тодруулбал, долоон настай охиныг гэртээ өвөөтэйгөө  байх үед нь төрсөн ээжийнх нь найз болох 28 настай, эмэгтэй С.А гэгч нь “Хамт тоглоомын талбайд тоглоё,” гэж худал хэлж гэрээс нь авч гарсан талаар Цагдаагийн байгууллагаас мэдээлсэн.  Улмаар маргааш нь буюу хоёрдугаар сарын 6-ны өдөр Чингэлтэй дүүргийн Салхит орчмоос тухайн эмэгтэйг баривчилж, хүүхдийг ар гэрт нь хүлээлгэн өгсөн байна.

Хүүхдийг авч явсан С.А нь тухайн үед согтууруулах ундаа хэрэглэсэн байсан гэж мэдүүлсэн ч энэ нь худал мэдээлэл болох нь тогтоогдсон байна. Хүүхдийг нэг хоногийн хугацаанд хаагуур авч явсан зэрэг шалгалтын ажиллагаа одоогоор  үргэлжилж байгаа бөгөөд хэрэгт холбогдогч  өмнө нь мөн гэмт хэрэгт холбогдож байжээ. Тодруулбал, С.А нь залилах гэмт хэрэг үйлдэж байсан бөгөөд СХДЦХ-3 аас эрэн сурвалжлагдаж байсан талаар эх сурвалж мэдээллээ.