Бээжингийн өвлийн олимпын наадам өнөөдөр албан ёсоор эхэлнэ

Энэ сарын 4-20-ны өдрүүдэд Бээжин хотноо зохион байгуулагдаж буй өвлийн олимпод ОУОХ-ны ангиллын дагуу 15 төрлийг нэгтгэсэн долоон спортын төрөлд 109 багц медалийн эзэд тодрох юм.

 “Нийтлэг ирээдүйн төлөө хамтдаа” уриан дор зохион байгуулагдаж буй өвлийн олимпын XXIV наадмын нээлт БНХАУ-ын нийслэл Бээжин хотноо албан ёсоор эхэлнэ.

Олимпын наадмын нээлтийн ёслол "Шувууны үүр" гэгдэх Үндэсний цэнгэлдэх хүрээлэнд болно. Ийнхүү Бээжин хотод 2008 онд зуны олимпын нээлт болж байсан бол өвлийн олимпын наадмыг зохион байгуулж байгаагаар аль алиныг зохион байгуулсан түүхэн дэх анхны хот болж буй аж. 

Нээлтийн ёслолын бүх үйл ажиллагааг урьдчилан бэлтгэх сургуулилалтад 4000 орчим хүн оролцсон байна.

Дашрамд дурьдахад Олимпын өргөн нэвтрүүлгийн үйлчилгээний компанийн гүйцэтгэх захирал Яннис Эксарчос : "Бээжингийн өвлийн олимпийн заал талбайгаас авахуулаад хэвлэл мэдээллийн төвийн дохионы холболтуудыг бэлэн болгосон бөгөөд өвлийн олимпийн заал талбайн дизайн, технологийн шийдлүүд нь маш гайхалтай болсон. Эдгээр заал, талбай нь өвлийн олимпын түүхэн дэх хамгийн шийдэлтэй заал, талбай болжээ. 2008 оны Бээжингийн олимпын нээлтийн ёслолтой харьцуулахад 2022 оны Бээжингийн өвлийн олимпийн нээлтийн ёслол маш өөр байх нь. Гэхдээ хүмүүсийн сэтгэлийг мөн л догдлуулсан, гүнзгий сэтгэгдэл төрүүлсэн нээлт байх болно. Энэ бол  үзэхгүй өнгөрүүлж болохооргүй ёслолын арга хэмжээ ” гэжээ.

Олимпын нээлт өнөөдөр 20:00 цагт болно.