Б.Энхбаяр: Хуулийнхаан Хөгжлийн банкны луйвар дээр новшрохгүй шүү

Хөгжлийн  банкны захирал Н.Мандуул энэ сарын 20-ны өдөр мэдээлэл хийж Хөгжлийн банкнаас авсан зээлээ төлөөгүй 26 компанийг эхний ээлжинд шүүхэд өгч байгаагаа мэдэгдсэн. Тэгвэл нийтдээ 69 компани Хөгжлийн банкны “найдваргүй зээлдэгч”-ийн жагсаалтад багтсан бөгөөд тэдгээр аж ахуйн нэгжийг шүүхэд өгч,  АТГ-аар шалгуулж байгаа аж.

Тэгвэл өчигдөр Хөгжлийн банкнаас олгосон нийт зээлийн багцын мэдээллийг гаргасан. Өмнө нь нэгдүгээр сарын 20-ны өдөр Хөгжлийн банкнаас чанаргүй зээл болон шүүхэд шилжсэн зээлийн  мэдээллийг олон нийтэд мэдээлж байсан юм. Тэгвэл УИХ-ын гишүүн Б.Энхбаяр Хөгжлийн банкны асуудлаар өөрийн цахим хуудсандаа дараах зүйлийг бичжээ. Тэрбээр " Хөгжлийн банкны луйвар дээр новшрохгүй шүү хуулийнхаан. Миний ахалж байсан 2016 оны шалгалтаар АТГ-руу шилжүүлсэн хэргүүд бараг бүгд хөөн хэлэлцэх хугацаагаар хэрэгсэхгүй болоод дууссан байна лээ шүү. Мэдээж энд хөөн хэлэлцэх хугацааг зассан нөхдүүд бас буруутай" гэжээ.