Д.Тогтохсүрэн: Төсөв хүндрэх төлөвтэй байгаа учраас Цар тахлын хуулийг он дуустал сунгасан

Ахмадын тэтгэврийг нэмэхтэй холбоотойгоор УИХ-ын ээлжит бус чуулган хуралдаж, энэ оны төсөвт тодотгол хийлээ. 2022 оны төсөвт өөрчлөлт оруулах хуулийн төслийг дагалдуулж, Цар тахлын хуулийг дахин зургаан сараар сунгаж, холбогдох хуульд мөн өөрчлөлт орууллаа. Ингэснээр Цар тахлын хууль энэ оны арванхоёрдугаар сарын 31-нийг хүртэл үргэлжлэхээр болов. 

Энэ талаар УИХ дахь МАН-ын бүлгийн дарга Д.Тогтохсүрэнгээс тодрууллаа. 

Тэрбээр "Цар тахлын хуулийг сунгасан нь үндсэн хоёр шалтгаантай. Нэгдүгээрт, 2022 оны төсвийг өргөн хүрээнд бид төлөвлөж, орлого талаас өөдрөг төсөвлөсөн. 42 сая тонн нүүрс экспортлохоор тооцсон. ААН-үүдээс төвлөрөх орлого мөн өндөр байна гэж тооцоолсон. Гэвч оны эхний нэг сарын байдлаас харахад, хил гааль хаалттайгаас төсвийн орлого хүндэрч болзошгүй нөхцөлтэй байна. Төсөвт байгууллагуудын цалин, хөлсийг хугацаанд нь тавьж чадахгүй нөхцөл үүсэхийг  үгүйсгэхгүй. 

Хоёрдугаарт, үнийн өсөлтөөс үүдэж инфляци нэмэгдэж байна. Тийм учраас Засгийн газар тухайн нөхцлүүдэд шуурхай арга хэмжээ авч ажиллах зайлшгүй шаардлага үүссэн гэсэн үг. Энэ зохицуулалтуудыг хийж байхын тулд Цар тахлын хуулийг дахин зургаан сараас сунгахаар болсон.Цар тахлын хуулиар төсвийн ерөнхийлөн захирагч нарын хооронд гүйлгээ хийх эрхийг Сангийн сайдад олгосон. Мөн төсөв хоорондын зохицуулалт буюу улсын төсвөөс Нийгмийн даатгалын төсөв рүү гэх мэт төсөв хоорондын зохицуулалт хийх эрхийг Сангийн сайд олгосон. Ингэснээр цаг үеийн шуурхай  асуудлуудыг  Засгийн газар хурдан хугацаанд шийдвэрлэх эрхийг нь үргэлжлүүлэн олголоо" гэв.