Б.Баттүшиг: Олимпын багийн эхний хувцас алдаатай гарсан тул засуулахаар буцаасан

Өвлийн олимпын наадамд оролцох баг тамирчид маргааш Бээжинг зорих тул  өнөөдөр төрийн далбаагаа гардан авах ёслол болсон.

Ёслолын үеэр өмссөн хувцас дээр Монгол Улсын нэрийг буруу бичсэн байна гэх шүүмжлэл цахим сүлжээнд хүчтэй өрнөөд буй.  Үүнд МҮОХ-ны Тэргүүн дэд ерөнхийлөгч Б.Баттүшиг  дараах тайлбарыг өглөө. Тэрбээр "Michel&Amazonka компанийн үйлдвэрлэсэн олимпын багийн эхний хувцас алдаатай гарсан тул засуулахаар үйлдвэр рүү буцаагаад байна. Олимпыг зорих багийн хувцас ямар нэг алдаагүй байх болно" гэж жиргэжээ.

Харин "Michel&Amazonka компанийн зүгээс "Michel&Amazonka нь Монгол улсын шигшээ багийн өвлийн олимпод өмсөх хувцас хэрэгслүүдийг хариуцан ажилласан. Уламжлал ёсоор нээлтийн өдөр буюу 2022 оны 2 сарын 4-ны өдөр албан ёсны зураг мэдээлэл тайлбарыг өгдөг билээ. Гэвч олон нийтийн сүлжээнд буруу ташаа ойлгогдохоор зураг мэдээллүүд гарч байгаа тул тамирчдын олимпын үеэр өмсөх хувцас хэрэглэлийн зургийг өнөөдөр урьдчилан нийтэлж байна.

Хувцас хэрэглэл нь эцсийн хувилбараар гарах хүртлээ хэд хэдэн удаагийн туршилтын загвар гарч байж батлагддаг. Тухайн сошиал орчинд тархсан зураг дээрх загвар нь анхны загвар байгаа болно.
Монгол улсын шигшээ багийн өмсөх ноосон хослолын эцсийн загвар дээрх G үсэг тодорхой болгон зассан харагдаж байгааг хавсаргасан зурагнаас харна уу.
Та бүхэнд үл ойлголцол үүсгэсэнд Michel&Amazonka хамт олны зүгээс хүлцэл өчиж байна.

Түүхий эд, материалын дутагдалтай хүнд үед үндэсний үйлдвэрлэлээ дэмжин биднийг сонгон хамтран ажилласан МҮОХ-нд талархал илэрхийлэхийн хамт Олимпын багийн хувцас хэрэгслийг урлах хүндэт үүргийг цаашид хичээнгүйлэн үргэлжлүүлэх болно" гэжээ. 

.