Н.Батсуурь: Маргааш би барилдана, хууль ёсны дагуу

XVII жарны "Буян үйлдэгч" хэмээх усан барс жилийн хаврын тэргүүн сар, сар шинийн баярт зориулсан Улс, аймгийн алдар цолтой 256 бөхийн барилдаан нэгдүгээр сарын 31-нд 12:00 цагаас нэг хоёрын даваа, хоёрдугаар сарын 01-ны өдөр 14:00 цагаас гурваас наймын даваа үргэлжилнэ.

Барилдах бөхчүүдийг өнөөдөр 10:00-17:00 цагийн хооронд цахимаар бүртгэж дуусна. Тэгвэл сар шинийн барилдаанд Даян аварга Н.Батсуурь барилдах тухайгаа өөрийн цахим хуудснаа мэдэгджээ. Тэрбээр энэ тухай "Маргааш барилдана, хууль ёсны дагуу" гэж бичээд, барилдах тухайгаа  МҮБХ-ны чат руу илэрхийлсэн ч  МҮБХ түүнийг бүртгэх боломжгүй юм байна гэсэн зурвас илгээжээ. 

Түүнийг сар шинийн барилдаанд барилдуулахгүй түүнээс хойшхи барилдаанд барилдах шийдвэрийг МҮБХ-ны тэргүүлэгчдийн хурлаас гаргасан байдаг.

2020 оны улсын наадмын дараа допинг илэрсэн улсын аварга Н.Батсуурь, улсын арслан Р.Пүрэвдагва, улсын харцага Б.Бат-Орших нарын барилдах эрхийг 11 сараар хассан билээ.

Шийтгэлийн хугацаа нь дууссан тул тэрбээр  энэ оны нэгдүгээр сарын 16-нд зохион байгуулагдах байсан Монгол Улсын харцага цолтонд хүндэтгэл үзүүлэх Улс, аймгийн алдар цолтой 256 бөхийн барилдаанд   барилдах гэсэн боловч бөхчүүд эсэргүүцэж тус барилдаан цуцлагдсан юм.