Л.Оюун-Эрдэнэ: Цастай, хүйтэн шөнө машин бариад явж байгаа мэт тийм л мэдрэмжээр нэг жил ажиллалаа

УИХ-ын чуулганы ээлжит бус хуралдаанаар төсөвт тодотгол хийх хуулийн төслийн анхны хэлэлцүүлгийг хийлээ. Энэ үеэр Ерөнхий сайд дараах байр суурийг илэрхийлэв. 

Тэрбээр "Өнөөдөр би Ерөнхий сайдаар ажиллаж эхлээд яг нэг жил болж байна. Өнгөрсөн нэг жилийн хугацаанд бүх талаар дэмжиж ирсэн УИХ-ын гишүүддээ талархаж байгаагаа илэрхийлье. Эдийн засаг -5.3 хувь руу буурсан ийм цаг үе байсан. Тухайн үед вакцин ч байхгүй цаг үе байсан. 230 мянга гаруй ажлын байр бодитоор эрсдэлд орсон хүндхэн цаг үе байсан. Нэг жилийн хугацаанд бид чамлахааргүй амжилтад хүрсэн. -5.3 хувь руу орсон эдийн засаг гуравдугаар улирлын байдлаар 3.6 хувь руу орж, ирэх жил 4 хувь руу орох төлөвтэй байна. Оюутолгой төсөл урагшилж, Шинэ сэргэлтийн бодлого хэрэгжиж өнөөдөр бид тэтгэвэр нэмэх асуудлыг ярих цаг  нь бүрдэж байна. Үүнд иргэд маань вакциндаа идэвхтэй хамрагдсаны үр дүн. Ингэж байж бид хатуу хөл хорио тавилгүйгээр эдийн засгаа сэргээж байна. Төсөөлж хэлбэл, цастай, мөстэй  хүйтэн шөнө машин бариад явж байгаа мэт тийм л мэдрэмжээр 365 хоног өнгөрлөө. Одоо ирэх хавар том төслүүдээ хөдөлгөх ёстой. УИХ-аас Оюутолгойн төслийг үр өгөөжийг нэмэгдүүлэхэд том дэмжлэг үзүүлсэн. Боомтуудын сэргэлийг сайжруулахтай холбоотой асуудлууд үлдсэн. Үүнд Хөгжлийн банкны дэмжлэг хэрэгтэй" гэлээ.