Г.Амартүвшин: Тэтгэвэр нэмэх зоригтой болсон нь Оюутолгойн гүний уурхайн бүтээн байгуулалт эхэлсэнтэй холбоотой

УИХ-ын ээлжит бус чуулганаар энэ оны төсөвт тодотгол хийх хуулийн төслийг хэлэлцэж байна. 

Энэ үеэр УИХ-ын гишүүн Г.Амартүвшин:Тэтгэвэр нэмэх асуудлыг зарчмын хувьд дэмжиж байна. Оюутолгойн далд уурхайн бүтээн байгуулалт эхэлж, эдийн засгийн эргэлтэд орохтой холбоотойгоор бид илүү ирээдүйдээ итгэлтэй болж байх шиг байна. Хэрэв энэ шийдвэр гараагүй байсан бол  630 тэрбум төгрөгийн санхүүжилтээр тэтгэвэр нэмэх асуудлыг ярихгүй байх байсан. Өнөөдөр Монголын эдийн засаг цөөхөн хэдэн том төслүүд дээр тогтож байгаа. "Эрдэнэс Тавантолгой", "Оюутолгой" гэх мэт. Эдгээрээс бусад хэрэгжээгүй том төслүүд ч байгаа. Цаашид бид том төслүүдээ яаралтай эдийн засгийн эргэлтэд оруулж татварын орлогоо нэмэгдүүлэхгүй бол өнөөдөр арга бараад л төсвөө танаж байна. Эдийн засгийн өсөлт дээрээ илүү их анхааръя. Оюутолгойн ач холбогдлыг өнөөдөр бүгд харлаа. Том төслүүдээ хөдөлгөхийн тулд санхүүжилт хэрэгтэй. Үүнд гаднын хөрөнгө оруулагч нь байх уу, алдарт "Хөгжлийн банк" нь байх уу  гэх мэт. Хөгжлийн банкны муу зээлийн асуудлыг аль 2019 оны үед болохгүй байна гэдгийг би ярьж байхад хэн ч тоогоогүй. Ямар ч  барьцаа хөрөнгөгүй. Энэ мэт асуудлаа ярьж, шүүхээр Хөгжлийн банкны асуудлыг шийдмээр байна" гэв.