Б.Пүрэвдорж: Ахмадууд уулзаад ярих гол зүйл нь Ерөнхийлөгчидөө баярлалаа гэнэ, гэтэл УИХ юу хийх вэ

Төсөвт тодотгол хийж,  2022 оны хоёрдугаар сарын 01-ний өдрөөс ахмад настнуудын тэтгэврийн доод хэмжээг 500.000 төгрөг хүртэл өсгөж, 500.000-аас дээш хэмжээтэй ахмад настны тэтгэврийг 15 хувиар нэмэгдүүлэхээр болсон. Уг төсвийн тодотголыг ээлжит бус чуулганаар хэлэлцэж эхэллээ.

УИХ-ын гишүүн Б.Пүрэвдорж:

- "Сөрөг хүчин өнгөрсөн хоёр жилийн туршид  тэтгэврийг нэмэх, зөрүүг арилгах талаар  байнга үг хэлж, дөрвөн хууль өргөн барьсан. Эдийн засгийн энэ хүнд үед тэтгэврийн ахмадуудын амьдрал үнэхээр хүнд байна. Сөрөг хүчний хийж байгаа тэмцэл дээр Ерөнхийлөгч санаачлагатай байж, Засгийн газар шуурхай чиглэл өгсний дагуу ээлжит бус чуулган хуралдаж байна. Ерөнхийлөгч, Ерөнхий сайдад талархал илэрхийлье. Ахмадууд цуглаад ярих гол зүйл нь одоо Ерөнхийлөгч санаачлага гаргаад тэтгэвэр нэмлээ Ерөнхийлөгчидөө баярлалаа гэж ярина. Гэтэл УИХ юу хийх вэ. УИХ тэтгэврийг бага тогтоож байгаа үндсэн шалтгаануудыг арилгах ёстой. Тухайлбал, хамтын тэтгэврийн тухай хууль. 

Төсвийн зарлагын хяналтын  дэд хорооны даргын хувьд төсвийн хуулийг хэлэлцэх үеэр хэд хэдэн санал гаргаж байсан. Нийтдээ 290 төсөл, арга хэмжээг царцаах юм бол 575 тэрбум төгрөг гарч ирэх боломжтой байгаа. Хэлэлцүүлгийн үеэр үүнийг хасаад 575 тэрбумыг  нэмээд өгчихье. Өнгөрсөн жил эдийн засаг хүндрэлтэй байсан ч гэлээ  нийгмийн даатгалын санд төвлөрүүлэх орлого 24 хувиар өссөн байна. 735 тэрбум төгрөгөөр нэмэгдсэн гэсэн үг. Энэ бол амжилт. Өнөөдөр 400 мянга гаруй иргэн тэтгэвэр авч байна.Нийгмийн даатгалын сангийн 24 хувийн нэмэгдэл буюу 724 тэрбумыг нэмэх саналтай байна. Зарим хөрөнгө оруулалтуудыг зоригтой хасаад явъя" гэлээ.