“Богд Зонхова” зэрэг 123 арга хэмжээний төсвийг царцааж, тэтгэвэр нэмэхэд зарцуулна

Өнөөдрийн Засгийн газрын ээлжит бус хуралдаанаар 2022 оны төсвийн тодотголын төслийг хэлэлцэж, УИХ-д өргөн барихаар болсон. Сар шинийн өмнө тэтгэвэр, тэтгэмж нэмэгдүүлэх чиглэл өгсний дагуу Засгийн газар 2022 оны төсвийн тодотгол хийж, өнөөдрийн УИХ-ын ээлжит бус чуулганаар хэлэлцэхээр болсон юм. 

Тэгвэл 2022 оны төсөвт суулгасан байсан зарим бүтээн байгуулалтын хөрөнгө оруулалтыг царцааж улмаар тэтгэвэр, тэтгэмжийг нэмэхээр төсөлд тусгасан байна. Энэ талаар Соёлын сайд Ч.Номин "Түүх, шашны соёлыг дэлгэрүүлэх “Богд Зонхова” цогцолборын төслийг миний бие цаг үеэ олоогүй гэж үзсэн учраас зориулалтыг өөрчлөх саналаа Засгийн газарт хүргүүлсэн байсан. Саналыг өнөөдөр Засгийн газрын ээлжит бус хуралдаанаар хэлэлцээд цогцолборын төсвийг ахмадуудын тэтгэврийг нэмэхэд зарцуулахаар шийдвэрлэлээ.

“Богд зонхова” төсөлтэй адил тэвчиж болох бүхий л хөшөө, дурсгалыг мөн царцааж, ахмад настнуудын тэтгэврийг үе шаттай нэмэгдүүлэхийг Засгийн газрын гишүүд бүрэн дэмжлээ" хэмээн өөрийн цахим хуудсаар мэдэгдлээ. 

Төсөвт тодотгол хийхээр олны шүүмжлэл дагуулж байсан Богд Зонхава, айрагны өргөө, Сэлэнгэ аймгийн нэг суманд барихаар төлөвлөсөн хоёр усан бассейн, Соёлын төвүүд зэрэг 123 арга хэмжээний төсвийг царцаахаар болжээ.