Засгийн газар тэтгэвэр, тэтгэмж нэмэх асуудлыг хэлэлцэнэ

Засгийн газар тэтгэвэр, тэтгэмж нэмэх асуудлаар өнөөдөр 09:00 цагт ээлжит бусаар хуралдана.

Хуралдаанаар, тэтгэвэр, тэтгэмжийг нэмэх асуудлыг төсөвт зохицуулалт хийх замаар шийдвэрлэж, 2022 оны төсвийн хуулийн нэмэлт, өөрчлөлтийн төслүүдийг боловсруулан УИХ-д өргөн мэдүүлнэ. Улмаар 14.00 цагт УИХ-ын ээлжит бус чуулган эл асуудлыг хэлэлцэн хуулийн төслүүдийг батлах юм.

Ерөнхийлөгч тэтгэвэр, тэтгэмжийг нэмэх чиглэлийг Засгийн газарт  өгч энэ дагуу УИХ-ын ээлжит бус чуулган хуралдаж, төсөвт тодотгол хийхээр боллоо. Тодруулбал, тэтгэврийн доод босго 350 мянган төгрөгийнг 500 мянган төгрөг болгох , бага тэтгэвэр авч буй ахмадуудын тэтгэврийг  ахиу нэмэх , мөн халамжийн тэтгэврийн хэмжээ болон байнгын асаргаа шаардлагатай 16 хүртэлх насны хүүхдэд олгох тэтгэмжийн хэмжээг  288 мянган төгрөг хэвээр үлдээх зэрэг асуудлыг төсөвт тодотгол хийхээр болжээ. Үүнд ойролцоогоор 700 орчим тэрбум төгрөг шаардагдах тооцоо гарсан байна. Засгийн газрын зүгээс нэн яаралтай бус зураг, ТЭЗҮ-гүй зарим хөрөнгө оруулалтыг царцаах замаар зарим санхүүжилтийг босгох бодлого барихаар төлөвлөж буй.