Н.Өнөрцэцэг: "Уучлахгүй Ё.Отгонбаяраа, зээлээ төл"

Улстөрийн өндөр албанд ажилладаг сайд асан Сэтгүүлчийн амь насанд заналхийлсэн асуудлаар Сэтгүүлчид мэдээлэл хийлээ.

Сэтгүүлч, Зариг.мн сайтын Ерөнхий эрхлэгч Н.Өнөрцэцэг: "Уучлахгүй Ё.Отгонбаяраа, зээлээ төл"

"Зариг.мн сайт Хөгжлийн банкнаас зээл аваад эргэн төлөлтөө хийгээгүй компаниудын баримтыг цувралаар мэдээллэсэн. Хамгийн сүүлд БСШУ-ны сайд асан Ё.Отгонбаярын эхнэрийн хувьцаа эзэмшдэг компани Хөгжлийн банкнаас 17,7 тэрбум төгрөгийн зээлийг авсан. Ё.Отгонбаяр сайд хөрөнгө орлогынхоо мэдүүлэгт Нүүдэлчин групп Мондулаан трэйд ХХК гэдгийг тусгасан байдаг. Нүүдэлчин группийг сайд асан Ё.Отгонбаярын эхнэр Шүхэртын Батнасан гэдэг эмэгтэй эзэмшдэг. Сайд асан энэ баримтаа өөрөө үгүйсгэдэггүй. Би 2018 онд энэ хүнтэй гэрлэсэн өөрөө албан ёсны твиттер хуудастаа мэдээлсэн. Энэ компани 2018 онд Хөгжлийн банкнаас зээл аваад одоог хүртэл төлөөгүй байгаа. Ердөө л ийм мэдээллийг сэтгүүлчийн зүгээс гаргаж тавьсан. Сэтгүүлч У.Оргилмаагийн хувьд манай гаргасан мэдээллийг /retweet/ хийгээд дор нь энэ компани бол Мондулаан компанитай холбоотой гэдэг мэдээллийг бичсэн. Харин сайд асан Ё.Отгонбаяр заналхийлсэн ийм үйлдэл гаргасан. Сэтгүүлчид ажил үүргээ гүйцэтгэж байхдаа маш олон дарамтад ордог. Энэ бүхнээ тоочоод байдаггүй.Харин энэ удаа амь насанд заналхийлсэн учраас олон нийтэд хандаж байгаа юм.  Өглөө сайд асан Ё.Отгонбаяр над руу чатаар "Ах нь бухимдсандаа ёс зүйгүй үг хэлжээ. Ахыгаа уучлаарай" гэх зүйлийг бичсэн. Миний хувьд "Үгүй, уучлахгүй". Хамаатан садныхаа хүнийг  заналхийлчихээд уучлалт гуйж байгаа биш.Хэрэв үнэхээр уучлалт гуйж байгаа бол Хөгжлийн банкнаас авсан 17.7 тэрбумынхаа зээлээ төл. Бид энэ хүний гэр бүлийн амьдрал руу шургаагүй, Ё.Отгонбаярын гэр бүл Хөгжлийн банк руу өөрсдөө орчихсон. "