Ц.Пүрэвхүү Ерөнхийлөгчийн зөвлөхийн ажлаас чөлөөлөгдөх өргөдлөө өгчээ

Сүүлийн үед агаарын бохирдолтой холбоотойгоор шүүмжлэлд өртөөд буй  Ц.Пүрэвхүү  Ерөнхийлөгчийн Байгаль орчин, ногоон хөгжлийн бодлогын зөвлөхийн ажлаасаа чөлөөлөгдөх өргөдлөө өнөөдөр /2022.01.20/ өгчээ. Тэрбээр уг албан тушаалд очсон шалтгаанаа хэвлэлд өгсөн нэгэн ярилцлагадаа "...Сүүлийн таван жилийн турш энэ салбарт иргэний нийгмийн байр суурийг илэрхийлсээр ирсэн намын харьяалалгүй, жирийн иргэд дундаас төрийн өндөр албан тушаалд томилох үйл ажиллагаа байдаггүй байх гэж боддог байсан. Байгаль орчны салбарыг таван жил гаднаас нь ярьж байсан хүнд ажил хийлгэх боломж олгож байгааг том боломж гэж харсан" хэмээн хэлж байв.

  “Утааны эсрэг аав ээжүүд” ТББ-ын тэргүүнээр ажиллаж байсан тэрбээр  Ерөнхийлөгчийн зөвлөх болоод ажлаа хийхгүй байгаад нь иргэд бухимдан хариуцлага нэхээд байсан юм. Түүнчлэн тус ТББ-ын санхүүгийн мэдээллийг ил тод тайлагнахыг түүнээс шаардаж буй. 

Тэрбээр 2021 оны долдугаар сард Ерөнхийлөгч У.Хүрэлсүхийн зөвлөхөөр томилогдсон юм.