Лифтны бичлэгтэй холбоотой шүүгчдийн асуудлыг шударга шүүхийг иргэд шаардаж байна

Шүүхийн сахилгын хороо нэгдүгээр сарын 14-ны өдөр хуралдаж, сахилгын зөрчил гаргасан гурван шүүгчийн асуудлыг хэлэлцэх байсан ч нэгдүгээр сарын 20-ны өдрийг хүртэл хойшлуулсан. Лифтны бичлэгтэй холбоотой шүүгчдийн асуудлыг шүүхийн Сахилгын хороогоор өнөөдөр хэлэлцэж байгаатай холбогдуулан иргэд шүүхийн гадна жагсаж, шударга шүүхийг  шаардаж байна.

Өмгөөлөгч Б.Баасанцогт зүй бус үйлдэл гаргахад Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатар, Булган аймаг дахь Эрүүгийн хэргийн анхан шатны шүүхийн шүүгч Д.Отгонбаатар, Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны шүүхийн шүүгч Х.Идэр нар хамт байсан нь бичлэгээс нотлогдсон байдаг. 

Дээрх гурван шүүгчид сахилгын арга хэмжээ авах тухай гомдлыг “Нэхүүл”, “Дархан Монгол ногоон нэгдэл” төрийн бус байгууллагуудаас Шүүхийн сахилгын хороонд гаргасан.

Уг гомдлын дагуу Сахилгын хороо хуралдаж байна. Учир нь Шүүхийн тухай хуулиар  Шүүхийн сахилгын хороо нь шүүгчдэд сахилгын хариуцлага тооцдог, сануулах, торгох, огцруулах арга хэмжээ авах эрхтэй юм.