ЗГ: Ирэх долоо хоногт Эрээн боомтод хуримтлагдсан бүх чингэлгийг татаж авч дуусгана

Засгийн газрын ээлжит хуралдаанаас гарсан шийдвэрийн талаар Ерөнхий сайдын хэвлэлийн төлөөлөгч Ч.Болортуяа дараах мэдээллийг өгсөн юм. Тэрээр "Эрдэмтдийн зөвлөлөөс энэ сарын сүүлээр тохиолдлын тоо хамгийн өндөр түвшинд хүрэх мэдээлэл өгсөн. Тиймээс хичээл сургуулийн үйл ажиллагааг хэрхэн эхлүүлэх талаар ЭМЯ, БШУ, УОК-ийг саналаа нэгтгэж шийдэх долоо хоногийн хугацаа өгсөн. Нэг зүйлийг тодотгож хэлэхэд, өнөөгийн нөхцөл байдалд хөл хорио тогтоох шаардлага байхгүй гэж үзсэн. Мөн одоогоор аль нэг байгууллагаас хөл хорио тогтоох тухай санал ирүүлээгүй. Ерөнхий сайдын зүгээс Засгийн газрын харьяа байгууллагын алба хаагчдын 50 хувиар ажиллуулах УОК-ийн саналыг дэмжээгүй. Төрийн алба бүрэн бүрэлдэхүүнээрээ ажиллах үүрэг, чиглэл өглөө" гэсэн юм.

Эрээн боомтын гаалийн баталгаат талбайд хуримтлагдаад байсан 985 чингэлгээс найм хоногийн хугацаанд 433 чингэлгийг татан авсан. Эхний өдөрт 23 чингэлгийг татаж авч байсан бол сүүлийн өдрүүдэд 60-65 болж нэмэгдсэн. Үүнээс үзвэл ирэх 8-9 хоногт боомтод хуримтлагдсан бүх чингэлгийг татаж авч дуусгана.