Ж.Ганбаатар: Тэтгэврийн мөнгө нэг тор уут хүнсэнд л хүрч байна, тэтгэврийг 900 мянгад хүргэх шаардлагатай

 Тэтгэвэр, тэтгэмж нэмэх боломжтой эсэх талаар Эдийн засгийн байнгын хорооны дарга Ж.Ганбаатараас тодрууллаа. Тэрбээр "Бараа, бүтээгдэхүүний үнийн өсөлт иргэдийн халаасанд шууд нөлөөлж байгаа. Өмнө нь ахмадууд тэтгэврийн мөнгөөрөө гурван тор хүнс худалдан авдаг байсан бол өнөөдөр нэг тор хүнс авах жишээний болж байна. Тиймээс тэтгэврийг нэмэх шаардлага зүй ёсоор бий болсон. Тэтгэврийн системийг өөрчлөх ёстой. Өнөөдөр ажил хийж байгаа хүн дунджаар 900 мянган төгрөгийн цалин авч байна. Гэтэл тэтгэвэрт гараад 400 мянган төгрөг авдаг ийм урвуу хамааралтай байж болохгүй. Тэтгэврийн хэмжээг дунджаар 900 мянган төгрөгт хүргэх хэрэгтэй. Ингэж хэлж байгаа нь поп сонсогдож магадгүй, гэхдээ энэ хэмжээний тэтгэвэр авч байж амьдралд нь бага ч болов нөлөөлнө. Дундаж цалингийн хэмжээнд хүргэх нь зөв гэж хэлнэ. 

Тэтгэврийг нэмэхийн тулд нэгдүгээрт төр данхагар бүтцээс салах ёстой. Төр хэтэрхий данхайсан. Төрийн байгууллагууд санхүүгийн замбараагүй байдалд дассан. Мөнгийг хайр гамгүй хэрэглэдэг. Хятадын Боомтын захиргаа нь бүх асуудлыг шийдэж байхад манайд 10 гаруй байгууллага оролцох жишээний. Төр болж тоглож байна шүү дээ. Бие бие рүүгээ жихсэн замбараагүй бүтэц бий болсон. Үүнийг халж урсгал зардлаа танаж байж тэтгэвэр нэмэх боломж бүрдэнэ. Төсвийн зарлагын 87 хувь нь урсгал зардалд зарцуулагддаг" гэлээ. 

ВИДЕО ШУУД ҮЗЭХ: