Ж.Мөнхбат: МҮОНРТ-ийн удирдлага гишүүдийн үүд сахиж, хов ярьж явдгаа болиорой

Өнөөдрийн /2022.01.18/ Төрийн байгуулалтын байнгын хорооны  хуралдаанаар "Монголын Үндэсний Олон нийтийн радио, телевизийн тухай хууль"-ийн хэрэгжилт болон тус телевизийн Үндэсний зөвлөлийн үйл ажиллагааны талаарх мэдээллийг сонслоо. 

Төрийн байгуулалтын байнгын хорооны дарга Ж.Мөнхбат МҮОНРТ-ийн талаар өмнө нь "Долоо хоног бүр ажлаас хууль бусаар халлаа, шахлаа, дарамталлаа гэдэг гомдол ирдэг. Энэ байгууллага дампуурахад маш ойрхон байна. Үндэсний зөвлөлөө хуралдуулж чадахгүй байна. Ажлаа тасалдаг. Өмнөх удирдлагууд нь шинэ удирдлагаа шүүхэд өгсөн гээд яриад байвал олон асуудал байгаа" тухай хэлж байсан.

Тэгвэл өнөөдрийн хуралдаанаар "МҮОНРТ-ийн ажил урагшлахаа байсан. Юм ярихаараа нэг хүнийг хална, томилно гэдэг л зүйл ярьдаг. Бодлого ярьж, асуудлыг нь шийд гэж томилсон шүү дээ. Өнөөдөр ажлаа хийж чадахгүй, төсвөө баталж чадахгүй энд ирээд сууж байгаадаа яг үнэндээ ичих хэрэгтэй. УИХ-ын гишүүдийн өрөөгөөр орж янз бүрийн хов ярьж явахаа гүйцэтгэх зөвлөлийн дарга болиорой” хэмээсэн юм.