Иргэн: Шахмал түлшийг түлэхээсээ өмнө наранд тавьж хатааж байна

Сайжруулсан түлшний чанарт шалгалт хийж, дүнг яаралтай танилцуулах үүрэг Ерөнхий сайд өгсөн билээ.
 Сайжруулсан түлшний үндсэн түүхий эд болох мидлинг болон түлшний чанарт шалгалт хийж, лабораторийн дүгнэлт гаргах, түлшний стандартыг дахин хянах үүрэг бүхий Ажлын хэсэг байгуулсан. Энэ хүрээнд шахмал түлшний чанар, бодит нөхцөл байдлыг тодруулахаар өнөөдөр  /2022.01.13/ Байгаль орчин, аялал жуулчлалын сайд, Эрчим хүчний сайд нар захын дүүргийн  зарим хороонд ажиллалаа. 

Энэ үеэр Сонгинохайрхан дүүргийн иргэн шахмал түлшний талаар хэлэхдээ "Шахмал түлшийг түлэхээсээ өмнө наранд тавьж хатааж байна. Шууд галлавал уугиад асалт нь маш удаан. Модтай хамт галладаг. Энэ жил түлшний чанар нь муудаж, үнэр нь маш муухай болсон, чанаргүй болсон нь үнэн. Өнгөрсөн жил хоёр хувингаар хийхэд өдрөө даадаг байсан бол одоо дөрвөн хувин хийж байж галтай байна. Хүмүүс гэртээ байгаад их галлаад байна гээд байх юм. Харин ч өнгөрсөн жил хөл хорионд иргэд бүр ч их галласан. Тэр үед ийм утаатай байгаагүй. Долоо хоногт зургаан уут  түлш хүрэлцэхгүй байна. Чанартай холбоотой байх" гэлээ.