Б.Лхагвасүрэн: Хаан банкны хувьцааг хэн, ямар хөрөнгийн эх үүсвэрээр авах гэж байна вэ гэдгийг судалж байна

ХААН банкны хувьцаа эзэмшигч Савада Хидео хувьцаагаа зарж байгаа асуудлаар Монголбанкны ерөнхийлөгч Б.Лхагвасүрэнгээс тодруулахад тэрбээр "ХААН банкны хувьцаа эзэмшигчид хэвээрээ байгаа. “Хаан банк” ХХК-ийн нийт хувьцааны 45.5 хувийг Япон улсын хуулийн этгээд “Савада холдингс” ХК, 14.5 хувийг “Савада холдингс” ХК-ийн охин компани “Эйч Эс Интернейшнл (Ази) Лимитед”, үлдсэн 40 хувийг “Таван богд трейд” ХХК холбогдох этгээдийн хамт эзэмшсэн хэвээр байна. Энэ үндсэн бүртгэл хэвээрээ гэсэн үг. Токиогийн хөрөнгийн биржид бүртгэлтэй “Савада холдингс” компанид маш олон хувь нийлүүлэгчид бий. Анх Хаан банкийг хувьчилж авч байхад Савада өөрөө 46 хувийг эзэмшдэг байсан бол 2013 оноос хойш өнөөдрийг хүртэл хувьцаагаа тодорхой хэмжээгээр зарж байгаа. “Савада холдингс” компани Хаан банкнаас гадна ОХУ, Япондоо мөн банк эзэмшдэг том компани.  Токиогийн хөрөнгийн биржээр дамжуулаад хэн ч хувьцааг нь авч болно. Одоогоор Монгол Улсын иргэн хувьцаа авсан болон өөрчлөлт орсон зэрэг мэдээлэл алга. Банкны тухай хуулиар банк биржид бүртгэлтэй нээлттэй компани болж байгаа. Ингэснээр Монголбанкны хяналтаас гадна хөрөнгийн бирж, Санхүүгийн зохицуулах хороо давхар хянана гэсэн үг. “Савада холдингс” компани  хувьцаагаа зарахад оронд нь ямар нөлөө бүхий хувьцаа эзэмшигч орох вэ гэдэгт Монголбанк дэлгэрэнгүй мэдээлэл авах нь  хуулийн хүрээний асуудал. Энэ хүрээнд Хаан банкны хувьцааг хэн, ямар хөрөнгийн эх үүсвэрээр авах гэж байна вэ гэдгийг судалж байна" гэлээ.

ВИДЕО ШУУД ҮЗЭХ: