ЭМЯ: Монгол Улсад омикрон хувилбарын 12 тохиолдол бүртгэгдлээ

Эрүүл мэндийн яамнаас мэдээлэл хийж байна. 

ХӨСҮТ-ийн ерөнхий захирал Ц.Билэгтсайхан омикрон хувилбараар өвчилсөн 12 тохиолдол батлагдсан талаар мэдээлэл өглөө. Тодруулбал, энхийг сахиулагчдаас 10 сорьц, Истанбул-Улаанбаатарын нислэгээс нэг, Банкок-Улаанбаатарын нислэгээс нэг илэрчээ.  омикрон хувилбар байж болзошгүй бусад шинжилгээг хийж байна. Шинжилгээний хариу гарах хүртэл нэлээд цаг хугацаа ордог гэдгийг тэрбээр онцоллоо.

Тэрбээр цааш хэлэхдээ  "Дэлхий нийтэд омикрон хувилбар гарснаас хойш манай улс хилийн тандалтын үйл ажиллагааг өнөөдрийг хүртэл буюу 40 хоногийн хугацаанд авч хэрэгжүүлсэн. Энэ хугацаанд агаарын 109 удаагийн нислэгээр 10773 зорчигч зорчигч ирсэн. Эдгээр иргэдээс 232 нь коронавирусийн халдвар авсан. Халдвар авсан 232 иргэний 104-ийг нь  хилийн нэвтрэх цэгт илрүүлсэн. Үлдсэн 128 нь гэрийн болон тусгаарлалтад байх хугацаандаа халдвар нь илэрсэн. Зөөвөрлөгдсөн 232 тохиолдлын дийлэнх нь буюу 102 нь Турк улсаас, 40 нь Тайландаас, АНУ-аас 25 тохиолдол бүртгэгдсэн. Хоёр нислэг тутмын нэгт нь халдвар зөөвөрлөгдөж байна. 

Зөөвөрлөгдсөн тохиолдол бүрийн хавьтлыг бид тодорхойлж байна. Нисэхийн тандалтын шинжилгээнд холбогдох байгууллагууд хамтран ажиллаж байна. Өнөөдөр улсын хэмжээнд 15 тусгаарлан ажиглах байр ажиллаж байгаагаас 3492 хүн тусгаарлалтад байгаагаас 119 тохиолдлыг илрүүлсэн" гэлээ.