"Дархан бэр" өргөмжлөх зэрэг хүйст суурилсан алагчлал нь хууль зөрчиж байна

"Дархан бэр", "Уран бэр" хэмээн өргөмжлөх, түүнтэй төстэй бусад арга хэмжээ нь Монгол Улсын Үндсэн хууль, Жендэрийн эрх тэгш байдлыг хангах тухай хуулийг зөрчиж байгаа талаар Жендэрийн үндэсний хорооноос өчигдөр дахин дараах мэдэгдэл гаргажээ.

Мэдэгдэлд "Төрийн болон төрийн бус зарим байгууллагаас Дархан бэр өргөмжлөх, түүнтэй төстэй бусад арга хэмжээ нь МУ-ын хууль, Жендерийн эрх тэгш байдлыг хангах тухай хуулийг зөрчиж байна. Хүйст суурилсан алагчлалын агуулга, нөлөөлөл бүхий санаачилга, арга хэмжээг төрийн бүх шатны байгууллага зохион байгуулах, биечлэн болон төлөөлөн оролцох, төсвийн санхүүжилтийг бүрэн болон хэсэгчлэх зэргээр аливаа байдлаар санаачлах, хамтрах, дэмжихээс татгалзах, энэ хүрээнд холбогдох хяналтыг тавьж ажиллах, түүнчлэн нийт байгууллага, иргэдийн зүгээс ийм төрлийн арга хэмжээ зохион байгуулахыг таслан зогсоох нь зүйтэй" гэжээ.