Соёлын дэд сайд М.Батбаяр: “Карантин 14”, “Мэдээллийн урсгал”-д төсвөөс нэг ч төгрөг зарцуулаагүй

Соёлын дэд сайдаас Наадам , “Ковидгүй зун” контентод их хэмжээний мөнгө төсвөөс зарцуулсан эсэх талаар тодруулж байна.

- Цар тахлын үед Карантин 14, Ковидгүй зун гэх мэт 1000 гаруй тоглолт, контент бэлтгэсэн гэж хууль тогтоогчид өчигдөр ярилаа. Эдгээр мөнгө төсвөөс гарсан юм уу? 

-Ковидгүй зун, Карантин 14 гэх мэт телевизийн нэвтрүүлэг, контентод төсвөөс нэг ч төгрөг гараагүй. Мөн Соёлын яамны харьяалах ажил биш. Монголын телевизүүд өөрсдийн нийгмийн хариуцлагын хүрээнд эдгээр нэвтрүүлгийг бэлтгэн гаргасан байх гэж бодож байна. -

- Баяр наадамд зарцуулсан гэх төсөв, мөнгөний асуудал сөхөгдөж байна. Жишээ нь, наадмын контентыг 980 сая төгрөгөөр хийсэн юм уу. Наадамд ер нь хичнээн төгрөг зарцуулсан юм бэ.

 -Юун түрүүнд Үндэсний их баяр наадам бол манай улсын тусгаар тогтнол, бүрэн эрхт байдлыг бэлгэдсэн үндэсний уламжлалт их баяр наадам, хүн төрөлхтний хувьд соёлын биет бус өв юм. Хэдийгээр сүүлийн жилүүдэд ковид цар тахлын улмаас уламжлалт баяр наадмаа өргөн дэлгэр тэмдэглэхгүй байгаа ч зохих хэмжээнд үндэсний их баяр наадмаа ёсчлон өнгөрөөж, ёс уламжлалаа хадгалсаар ирсэн. Энэ ажилд гар бие оролцож, нийгмийн хариуцлагын хүрээнд үнэ төлбөргүй ажилласан хувь хүн, байгууллага мөн бий. Харин хуульд заасны дагуу, Засгийн газрын тогтоолоор Үндэсний их баяр наадмыг зохион байгуулах хороо байгуулагдаж, тэр хороо нь зардлын төсвийг батлах тухай тогтоол гаргадаг. Өөрөөр хэлбэл, салбар хороод үндэсний их баяр наадмыг зохион байгуулах хорооноос өгсөн үүрэг, даалгавар, батлагдсан төлөвлөгөө, төсвийн хүрээнд салбар хороод нь зохион байгуулж ажилладаг гэсэн үг. Тэгэхээр үндэсний их баяр наадмын төсөв, зарцуулалттай холбоотой асуудлыг нийслэлээс асуусан нь зөв байх.

 - Та өчигдөр 980 сая төгрөгийг наадмын контент хийхэд зарцуулсан гэж хэлсэн. 

-Өчигдөр бага зэрэг үл ойлголцол гарсан. Эдийн засгаа сэргээх хөтөлбөрийн мөнгөнөөс контентод зарцуулсан мэт ойлголт явж олон нийтэд ташаа мэдээлэл тарсан. Эдийн засгаа сэргээх хөтөлбөрөөс нэг ч төгрөг ямар нэг контент, нэвтрүүлэг болоогүй. Харин үндэсний их баяр наадамтай холбоотой асуудал, төсөв мөнгө нь миний түрүүн хэлсэнчлэн Үндэсний их баяр наадмыг зохион байгуулах хорооны тогтоолын дагуу явж байгаа учраас дэлгэрэнгүй мэдээлэл, төсвийн зарцуулалтыг нийслэлийн төсвийн зарцуулалтаас харж болох байх.