Соёлын дэд сайд М.Батбаяр: Наадмын өдрүүдэд ард түмэнд хүрсэн наадам контентод 980 сая төгрөг зарцуулсан

УИХ-ын Эдийн засгийн байнгын хорооны хуралдаанаар Монгол Улсын Засгийн газрын 2021 оны 02 дугаар сарын 17-ны өдрийн 42 дугаар тогтоолоор баталсан “Эрүүл мэндээ хамгаалж, эдийн засгаа сэргээх 10.0 (арван) их наядын цогц төлөвлөгөө”-ний хэрэгжилтийн талаарх мэдээллийг сонсож байна. 

Энэ үеэр УИХ-ын гишүүн Б.Энхбаяр 10 их наядын цогц төлөвлөгөөний хүрээнд телевизийн соёл урлагийн контентуудад төсвийн мөнгийг зарцуулсан байна. Цар тахлын хөл хорионы үед 1059 тоглолт, контент бэлтгэсэн байна. Карантин 14, Ковидгүй зуны төлөө, Мэдээллийн урсгал зэрэг нэвтрүүлгүүд байна. Тухайн үед төсвийн нэг ч төгрөгийг телевизийн контентод зориулаагүй гэж хэлж байсан. Улсын төсвийн ичнээн төгрөгийг ямар нэвтрүүлэгт зарцуулсан бэ гэдгийг тодрууллаа. 

Түүний асуултад Соёлын дэд сайд М.Батбаяр хэлэхдээ 10 их наядын хөтөлбөрийн хүрээнд манай яамны хариуцсан гурван асуудал тусгагдсан. Ихэнх нь нийгмийн сэтгэлзүйг дэмжих, соён гэгээрүүлэх кэрэг арга хэмжээний хүрээнд нийт найман контентыг 16 телевизээр гаргасан. Үүнд 10 их наядын мөнгө зарцуулагдаагүй. Наадмын өдрүүдэд ард түмэнд хүрсэн наадам контентод 980 сая төгрөгийг зарцуулсан гэлээ.

Тодруулбал, өнгөрсөн жил наадам хийгээгүй ч Херо Баатарын “Би монгол хүн”  наадмын контентыг бэлтгэн хүргэсэн билээ.