"Судалгаагаар өмнө нь халдвараар өвчилж байсан мөн вакцинд хамрагдсан хүмүүс омикрон хувилбарыг маш хөнгөн тусч байна"

Эрүүл мэндийн яамнаас вакцины нэмэлт тун болон Омикрон хувилбарын талаар мэдээлэл хийлээ.

Эрүүл мэндийн сайдын зөвлөх О.Батбаяр : "2021 оны арваннэгдүгээр сарын 27-ны өдрөөс хойш 95 нислэгээр 9723  зорчигч ирсэн. Тэдний эхний шинжилгээнээс 63 хүнээс, хоёрдахь шинжилгээгээр 75 хүнээс халдвар илэрсэн. Энэхүү шинжилгээнүүдэд үе шаттайгаар генийн дараалал тогтоох шинжилгээг хийж байна. Өнөөдрийн байдлаар манай улсад омикрон хувилбар бүртгэгдээгүй. 

Энхийг сахиулах ажиллагаанд оролцоод ирсэн 244 алба хаагч ирснээс эхний шинжилгээгээр 120 нь эерэг гарсан. Алба хаагчид нэг онгоцоор ирсэн учраас халдвар тархах эрсдэлтэй байсан. Ингээд дахин шинжилгээ авахад эерэг гарсан алба хаагчид нэмэгдсэн. Ирэх замдаа онгоцонд халдвар авсан гэсэн үг. Одоогийн байдлаар тэдгээр алба хаагчдаас Омикрон хувилбар илрээгүй байна. Тусгаарлалтын хугацаа эхнээсээ дуусаж байгаа. 

Хамгийн их тохиолдол бүртгэгдсэн нислэг өнгөрсөн оны арванхоёрдугаар сарын 24-ны өдөр Тайланд улсаас ирсэн нислэгээс эхний шинжилгээнээс дөрөв, хоёрдахь шинжилгээнээс 10 хүнээс халдвар илэрсэн. Мөн  арванхоёрдугаар сарын 27-ны өдөр Тайланд улсаас ирсэн зорчигчдоос  10-д нь халдвар илэрсэн. Эдгээр шинжилгээнээс Омикрон хувилбар илрээгүй. 

Одоогоор омикрон хувилбар дэлхийн 100 гаруй улсад тархсан. Энэ хувилбарыг Африк улсын эрдэмтэд судалж, нээсэн учраас тодорхой судалгаануудыг хийсэн байна. Уг судалгаагаар халдвараар өмнө нь өвчилсөн хүмүүс мөн вакцинд хамрагдсан хүмүүс омикрон хувилбарыг маш хөнгөн тусч байна гэж Африк улсын эрдэмтэд  судалж тогтоожээ. Тиймээс иргэд вакцины гурав дахь тундаа идэвхтэй хамрагдах шаардлагатай байна" гэлээ.