УИХ дахь Ардчилсан намын бүлэг ганц хүнтэй хуралдсаар байх уу

Маргааш шинэ долоо хоногийн ажлын анхны өдөр УИХ дахь намын бүлгүүд хуралдана. Харамсалтай нь сөрөг хүчин болох УИХ дахь Ардчилсан намын бүлэг өнгөрсөн жилийн талд нь Д.Ганбат гэсэн ганцхан гишүүнтэй хуралдсаар он гаргасан билээ. 

Нэг талдаа УИХ-ын гишүүд нь сонгосон Бүлгийн даргаа хүлээн зөвшөөрөхгүй байгаа мэт харагдах боловч, хэргийн эзэн хэнгэрэгийн дохиур нь Бүлгийн дарга Д.Ганбат өөрөө болж хувирна. Тэрбээр өнгөрсөн жил эрх баригчдаас гурван сайдын суудал авч МАН-ын Засгийн газарт орж хамтрахаар нууц тохироо хийж яваад бусад УИХ-ын гишүүддээ баригдаж булайгаа дэлгэсэн. Мөн Бүлгийн шийдвэрээ танилцуулах хэвлэлийн хурал дээрээ хувийн бодлоо ярьдаг, тэр битгий хэл өөрөө өөртэйгээ хэрэлддэг зэрэг сөрөг хүчний бүлгийн даргын хувьд байж боломгүй алдаа гаргаж, олон асуудал дээр буруутан болж буй. Тиймээс түүнийг Бүлгийн дарга гэж хүлээн зөвшөөрөх гишүүнгүй хагас жил ганцаараа хуралдаж байгаа юм. 

Нөгөө талд Ардчилсан намын анхан дунд шатны гишүүд дэмжигчдээс эхлүүлээд, бүх л хүн тус намын бүлгийн гишүүдэд “Д.Ганбатыгаа солиод өгөөч” гэдэг хүсэлтийг жилийн турш илгээж байгаа гэх мэдээлэл бий. Ганцаараа хурал хийдэг бүлгийн асуудал цаашид яахыг харах л үлдлээ.