Э.Бат-Үүл: Хэрэг, хохирол хоёрыг над дээр зохиолоо

Шүүхээс Э.Бат-Үүлийг гэм буруутайд тооцож, дөрвөн жилийн хорих ял оноосонтой холбогдуулан хүү Б.Чулуудай нь мэдээлэл хийж байна.

Шүүхээс Э.Бат-Үүлд дөрвөн жил хорих, түүний хүү Б.Чулуудайг 15 сая төгрөгөөр торгох, ТОСК-ын захирал асан А.Гантулгад таван жил хорих ял тус тус оноосон байна.

Э.Бат-Үүлийн хүү Чулуудай: Хэвлэлийнхэн нөхцөл байдлыг бодитоор дүгнэж дамжуулаарай гэж хүсч байна. Өнөөдөр аавыг минь хилс хэрэгт гүтгэлээ. Өөрөө огт оролцоогүй, хийгээгүй, мэдээгүй байсан хэргийн төлөө хохиролтой гэж  нийслэлийн удирдлагуудаас хохиролтой гэж нэхэмжлэл гаргасны дагуу хохирол төлүүлж, дөрвөн жилийн хорих ял оноолоо. Бид хоёрыг анх хамт ялласан. Гэхдээ миний хэргийг шүүхээс хэрэгсэхгүй болгосон. Би аавынхаа төлөө тэмцэнэ. Үнэхээр шударга бус байна. Хэргийн хөөн хэлэлцэх хугацаа 2018 онд дууссан. Аав маань энэ бүхнийг мэдээгүй  байсан. Бид хуулийн дагуу давж заалдана. Эцсийг нь хүртэл тэмцэнэ. 

Аав минь захиж хэлэхдээ "Нэгдүгээрт, хэрэг, хохирол хоёрыг над дээр зохиолоо. Би шударга ёсны төлөө тэмцэнэ. Шүүхийн хараат бус байдал, гэр хорооллынхоо төлөө тэмцэнэ. Би улс төрийн тэмцэл хийж байхдаа хэнийг ч гүтгэж, гутаан доромжилж байгаагүй. Монголын ардчилал ялна" гэж хэлүүллээ. Миний аав ардчиллын төлөө 30 гаруй жил тэмцсэн. Энэ тэмцэл заавал ялна. Энэ хэргийг зохиосон хүн бүртэй тэмцэж, арга хэмжээ авна. Улсад нэг ширхэг мөнгөний хохирол үзүүлээгүй. Шүүх байгууллагыг хүндэтгэж, өнөөдрийг хүртэл бид чимээгүй байсан" гэлээ.