Эрээний хил хэзээ нээгдэх асуудлаар ХЭН ЮУ хэлэв?

Заригийн сурвалжлах групп Замын-Үүд суманд ажиллаж, нөхцөл байдлыг газар дээрээс нь шууд дамжуулж байна. Энэ хүрээнд Замын-Үүд сумын Засаг дарга Б.Анхбаяраас бодит байдлыг тодрууллаа. 

Замын-Үүд сумын Засаг дарга Б.Анхбаяр: Энэ сарын 10,11-нд БНХАУ-аас 53 тээврийн хэрэгсэл орж ирсэн. Үүнээс Глобал моторс гэх компанийн 16 суудлын автомашин орж ирсэн. Мөн уул, уурхайн 10 машин, нүүрсээ буулгаж чадаагүй 15 тээврийн хэрэгсэл ирсэн.

Замын-Үүд сумын Хилийн цэргийн 0108 дугаар ангийн штабын дарга Н.Баяржаргал: Энэ сарын 12-нд БНХАУ-аас журмын дагуу ачаа, бараатай машиныг манай хил рүү оруулж ирэх байсан боловч оруулж ирээгүй. Ямар учиртайг нь Эрээн хотод суугаа МУ-ын консулаас тодруулахад арванхоёрдугаар сарын 10,11-нд туршилтаар оруулж ирсэн 53 тээврийн хэрэгслийг хилээр нэвтрүүлсэн үйл ажиллагаанд БНХАУ-аас үнэлэлт, дүгнэлт хийж байгаа гэх мэдээлэл ирсэн. Үнэлэлт, дүгнэлтээ хийж дуусаад үлдсэн 100 орчим машиныг манайх руу нэвтрүүлж, чингэлэг тээврээ үргэлжлүүлнэ гэх мэдээллийг өгсөн.

Замын-Үүд сумын АТҮТ-ийн дарга Д.Болор-Эрдэнэ: Манай авто тээврийн салбар, тээвэрчид БНХАУ-аас ачаа бараа оруулж ирэх бүх бэлтгэлээ хангаад байгаа. Одоо БНХАУ-ын Эрээн боомтоос чингэлэг орж ирэхийг хүлээгээд, ажил нам гацчихсан байна.

Тээвэрчид: Төрөөс Эрээний боомтоор ачаа оруулж ирээд байна гэж нийгэмд эргэлзээ үүсгэж байна, тээвэр зогсоод хоёр сар болж байна

Тээвэрчид: Нэг машинаар оруулж ирэх ачааг чингэлэг тээврээр 3-4 хувааж оруулах нь тээврийн зардлыг тэнгэрт хадаана.