ЭРҮҮЛ МЭНДИЙН ЯАМНААС 7000 ТУН ВАКЦИН НИЙЛҮҮЛЛЭЭ

Эрдэнэт үйлдвэр ажилтнуудынхаа дархлааг сэргээж дэмжих зорилгоор вакцинжуулалтын 3 дахь тунд хамруулж эхэллээ. Энэ удаа уурхайчид Америк, Герман улсын хамтран үйлдвэрлэсэн Файзер вакцин хийлгэж байгаа юм. Үйлдвэрийн захиргаанаас эхний ээлжинд 3 дахь тунг хийлгэх хүсэлтээ ирүүлсэн ажилтнуудаа богино хугацаанд, урт дараалал үүсгэхгүй хамруулахын тулд Спорт ордон, Ерөнхий захиргааны 1 дүгээр байр, Засвар механикийн завод, Дулааны станц зэрэг 4 цэгт тарилгын байр гарган, энэ сарын 9-12-ны өдрүүдэд зохион байгуулж байна. Өнөөдөр Спорт ордны байранд өглөөний 8.00 цагт эхэлсэн вакцинжуулалтад нэг цагийн дотор 100 гаруй ажилтан хамрагдав. Энэ үеэр 3 дахь тунгаа хийлгэж буй Эрдэнэт үйлдвэр ТӨҮГ-ын Ерөнхий захирлын Санхүү, эдийн засгийн асуудал эрхэлсэн орлогч Д.Үүрийнтуяагаас Файзер вакцины талаар сэтгэгдлийг нь  тодрууллаа. 

     Тэрээр “Миний хувьд, 1,2 дугаар тунгаа Вероцелл вакцин хийлгэсэн. Дэлхийн эрүүл мэндийн байгууллагын зөвлөмжийн хүрээнд манай улс Файзер вакцины 3 дахь тунг хийлгээд эхэлсэн байгаа. Эрдэнэт үйлдвэр ч мөн энэ вакцинд уурхайчдаа хамруулах ажлыг шуурхай зохион байгуулж, эхлүүллээ. Вероцелл вакцин хийлгэсний дараа Файзер вакцин тариулах нь илүү үр дүнтэй байна гэсэн мэргэжлийн байгууллагуудын зөвлөгөөг бид дагаж байна. Энэ вакцины хамгаалалтын үр дүнд ковидын халдвараас сэргийлэх, халдварласан тохиолдолд хүндрэл багатай, хурдан эдгэх боломжийг олгох юм гэж ойлгож, хийлгэлээ. Цар тахлын тархалт буурахгүй байгаа энэ хүнд цаг үед Монгол Улсын Эрүүл мэндийн яам, тасралтгүй үйл ажиллагаа явуулах үүрэгтэй, стратегийн чухал ач холбогдолтой Эрдэнэт үйлдвэрийн асуудлыг онцгойлон авч үзэж, шуурхай шийдвэрлэн  нийт 7000 тун вакцин нийлүүлсэн. Энэ 7000 тунг хийлгэх ёстой 5000 орчим уурхайчин байна. Үлдсэнийг нь ажилтнуудынхаа ар гэрийнхэнд сайн дурын үндсэн дээр хийхээр төлөвлөсөн байгаа. Иймээс манай уурхайчид 3 дахь тунд идэвхтэй хамрагдаж, ЭМЯ-наас шуурхай олгосон вакциныг цаг хугацаанд нь хийлгэж, хамтарч ажиллахыг нийт хамт олондоо уриалья” гэсэн юм.